【新增回應】
新城電台高層程凱欣確診後，為港台主持電台節目的時裝設計師鄧達智亦初步確診武漢肺炎，網台D100為安全起見，於是下令所有DJ須戴口罩做節目。不過梁思浩與李麗蕊及陳彥行為D100主持《大家「真」風騷》時，就堅拒戴口罩，只得另外兩拍檔戴口罩，被網民鬧爆行為自私。事後梁思浩解釋自己不在公司開咪，自己租用私人錄音室做節目，節目前後已全面消毒，聲稱十分安全。
今日《蘋果》收到消息，指梁思浩因為堅拒戴口罩做節目而跟D100高層吵大鑊，明天起「劈炮唔撈」。《蘋果》向D100總經理蔡浩樑求證，他說：「思浩呢話佢戴口罩講唔到嘢，影響節目質素，於是佢自己租咗個錄音室做節目，節目前後都搵人消毒，但試咗幾日效果都唔好，而噚日同今日，佢做節目嘅時候都冇影到自己成個樣出嚟，同埋佢戴口罩戴得唔係咁好，有時又掹鬆咗，咁佢做完節目之後我就打畀佢，叫佢不如戴口罩返嚟D100做，或者用視像做節目，但佢話唔好。」
既然大家意見不一無法達成共識，節目方面如何安排？D100總經理蔡浩樑表示：「聽日都係搵人代住佢做節目先，因為節目係一季季，佢呢季仲有20幾集，我哋都要fulfill番我哋嘅訂戶，佢話搵人代住佢做住先，睇吓疫情進展點樣再作打算。因為呢個疫情，聽眾同我哋反映（指梁思浩不戴口罩做節目），我哋都好大壓力，所以叫思浩要做番個榜樣戴返口罩，但佢話適應唔到戴口罩做節目，話好辛苦，我哋又有自己立場，所以今日同佢傾過之後，同意搵人代替佢同陳彥行及李麗蕊拍檔做，我哋大家都係好平心靜氣下商量，冇吵大鑊。」
對於有傳因為戴口罩問題而與D100高層吵大鑊，《蘋果》今日亦有向思浩求證，他否認雙方曾經吵大鑊，但承認無法達成共識，思浩又稱在疫情嚴峻的時候，他自掏腰包租用私人直播室，而且亦納米清潔，但奈何對方亦不接受：「我本身係一個講嘢好快嘅人，戴住口罩真係好辛苦，感覺好似係戴住口罩唱快歌，之後我都有戴口罩做節目，但我拉低過咗，露出個鼻哥窿唞氣，不過佢哋都覺得唔符合安全標準，唔接受我呢個做法，既然人哋唔肯退一步，咁我咪自己退囉。」他續說：「我同D100唔係員工同僱主關係，我哋係合作夥伴，以分賬形式合作，所以其實係我要求要換人，而家我搵咗鄒攝幫手，佢會同行姐同李麗蕊一齊做埋嗰20幾集。」
問到雙方的關係是否告一段落？思浩表示：「我唔否定，將來嘅嘢將來再算喇，我自己做咗呢個節目都有10年，我都有同大班（鄭經翰）講番呢件事，好多謝大班嘅體諒。我而家會專注做兩個電視節目，其他嘢等疫情緩和咗算。」至於D100總經理蔡浩樑表示因有聽眾向他們反映而感到大壓力，思浩則說：「唔緊要喇，香港人有邊個係冇壓力㗎？」陳彥行亦有回覆《蘋果》，她表示會繼續留任，直到這一季完結為止。
思浩亦有在FB貼了一張戴口罩的相片並說：「今天心情特別靚，天氣好心情也靚（不知為何今天感覺個人輕了）。我常說：我們改變不到大環境，但可以改變自己心情！帶着環保盒去買自己最鍾意的食物！帶回家吃！（如果可以嘅話大家都支持環保自攜食物盒）笑着面對困難，請相信一切嘅困難都會過！未來的日子一定會好！大家同心協力，困難嘅日子一定好快過！大家加油！」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
