貼地零膠質
相隔十八年，48歲的鄭中基再一次孭飛拍劇，一個好劇本、好對手，必然是關鍵之處。ViuTV《暖男爸爸》日前首播，單親爸故事，骨幹主題，鄭中基一句對白帶出:「如果第一次演得差的話，會唔會有第二次機會呢！」每個人錯過了，可有第二次？如何珍惜再有的機會！
打動鄭中基接拍，是同樣打動觀眾一元素，就是貼地劇情與無膠質對白。「對白已經好人性化，有啲仲好抵死，自己睇到都會笑，覺得好嘢喎！有好幾場戲嘅對白，邊睇邊讀嘅時候，就已經可以入到嗰個世界，知道發生咩嘢事。而唔係有啲對白，你睇完會覺得正常人唔會咁樣講喎。例如門鐘響，會話「有人㩒鐘嘅？」，係人都聽到有人㩒鐘，唔需要再講呢啲說話，即係無咩無謂對白，我覺得幾舒服，係一套幾自然嘅劇集。」
- 鄭中基說，《暖男爸爸》是他拍的劇集中，少數不用再修改對白，「對白已經好人性化，有啲仲好抵死，自己睇到都會笑，覺得好嘢喎！」
- 劇集主旨:「如果第一次演得差的話，會唔會有第二次機會呢！」，人生劇本，總有演得不當時候。曾經在事業、愛情都犯過大錯的鄭中基，卻在他的Second chance，珍惜做好。
- 第三集尾段，鄭中基在大排檔回憶老婆點滴，由眼泛淚光至淚如泉湧，再響起他名曲《無賴》，整個情節勁洋蔥，把劇情推到一個高潮位，網民激讚。
有難度有挑戰先好搵我
劇中另一「驚喜」亮點，是今年初離開效力37年大台的劉江叔，因不能接受大台減薪一半，如佢話齋:「連車都養唔起的人工！」，於是73歲劉江畀自己演藝事業，不是Second chance，而是Second choice，如劇中對白:「未來因為我哋嘅選擇而改變。」他，不再續約。跳出「圍城」，隨即在另一天空光復風采。活到這年頭，劉江叔求的只是好劇本與過足戲癮。講到明，無難度無挑戰的角色，非誠勿擾，唔使搵我！
當日《暖男爸爸》的監製及導演敲門，不需太費唇舌便一拍即合，因為認真演員遇上認真班底。
「我接到好多角色都係好困難，就係因為困難所以我先至做，如果好易做的話，我就唔係咁有興趣，呢個係事實。因為到我而家呢個環境，我仲想做咩？梗係對自己有啲挑戰。聽完《暖男爸爸》劇本之後的確覺得好難，但又好想做。」
- 有heart的鄭中基，遇上認真的劉江叔，劇中演情感矛盾的父子，火花四起。
- 73歲，劉江叔對演戲要求有增冇減！「我記得有一日，監製話下次再搵我合作，但我話要有挑戰性先好搵我，佢話你演咗咁多年，仍咁著緊呢啲，我話梗係啦，無挑戰性有咩意義，根本無意思。」
首日埋牙拍戲肉
口中的難度，是跟鄭中基演釋似近還遠的父子情。劉江叔佔戲不多，但在於精，一日之內完成全劇幾場重頭戲，還要開工第一日，兩位未熱身就要埋牙演那幕在護老院父子首度相見的戲肉，好Heavy！鄭中基說:「我記得第一日開工拍第一場戲，就已經要坐低喺度喊，就係因為感受問題，見到阿爸咁樣。我記得當日望住劉江叔，而劉江又望住我，我記得一直都唔開對白，劉江叔好似覺得點解我咁耐都唔講對白嘅，然後我一直做，之後滴咗一滴眼淚，劉江叔見到我滴完嗰滴眼淚，就開始講嘢。之後佢話會睇住我，放心唔好緊張，我見到你滴眼淚就會開始講。」
劉江問:「坦白講，同我合作之後，有冇覺得我帶住你，抑或我有好多戲，令你有另一種感覺？」
「有呀，例如我有諗過會係差唔多類似情況，但真係同你做嘅時候就唔同咗。」與高手過招，鄭中基更要打醒十二分精神。
- 劉江叔雖佔戲份不多，但場場都是發光的演出，一日完成幾場戲份，包括父子終於相見的戲肉，二人首日開工，未熱身即埋牙切磋。
73歲仍要刺激
貴精不貴多的父子戲，專業的劉江叔，在每個細節位都心思細琢。「你第一次入嚟望住我嘅時候，我喺度行緊，條走廊好長，我諗咗好多種形式。你第一次見我嘅感覺係點樣呢？如果你已經知道我係老人痴呆，咁我要點樣表現嗰樣嘢俾你睇？因為你睇到就等於觀眾知道，劇本只係寫你睇住我慢慢行過去，然後偷偷哋望住我。所以第一日■搵咗我，然後約我飲茶，跟住見監製，同我講故事嘅時候，我話好難做喎，真係好難做，我問點樣做？真係唔掂，你唔覺得難做咩。」深度演繹，73歲依然做足功課。
昔日TVB做戲要遷就對手
識英雄重英雄，老戲骨遇上有heart對手鄭中基，劉江叔說那種暢快，在舊東家沒有。「你剛才問同以前有咩唔同，有一樣真係唔同，因為我哋咁樣做，我無後顧之憂，因為唔需要顧住佢，但喺TVB就唔同。」他說在TVB時，因一種「顧全大局」文化，好戲之人要遷就唔同level的對手。「無錯，喺TVB做戲，我哋叫做大我取向，唔係小我取向，點解呢？即係我喺呢場戲裡面嘅作用要顧全大局，唔係話自己做得好就可以，我做咗咁多年，大家都知道我好唔好，唔好就唔好，好就好，我唔需要去理。唔會諗呢場戲點樣出位，我哋唔係咁樣，要睇全場戲。但而家呢度唔同，因為我都唔需要理佢，我就係做我自己，其實反而仲好。因為喺嗰啲環境，有時候自己會失分。即係我唔可以掩蓋你，掩蓋咗你都無用，我望你好，你好我先至好，唔淨係想自己好。以前會遇到一啲高水平，一啲低水平，(新舊環境)呢方面係最大分別。」事業Second choice ，老來的劉江可以更精采。
得失從不看重
他在舊東家之作《今宵大廈》，早前開拍續集，演技獲一致激讚的劉江，因離巢無緣參予，令網民感到失望，但他卻這樣看:「直至目前為止都無人搵我，觀眾唔會失望，點會失望？無咗呢個角色就唔會失望。如果有呢個角色，但由第二個人去演就會失望啫，如果無呢個角色，點會失望？唔好睇得咁重要，其實好虛空。」半退休的他，除想繼續過戲癮，還有一件事好想做。「好老實講，一唔做TVB，其實都係想出去玩吓，鍾意嘅就去邊度，但而家得個恨字，覺得如果可以去到就好喇！」
鄭中基
Wardrobe: @harrisonwong
Make up: @monzichunmakeup
Hair: Horace @hairplay_hk
Venue: 富衛1881公館
攝錄:LL production house
攝影:吳斯金
----------------------------
《噴火30年壹驚艷 性感女星典藏集》特刊現已出版，各大書報攤、便利店及《壹出版》網店有售，每本港幣九十八元正。
按此購買
----------------------------
守住新聞自由 和你撐壹週刊計劃 每月港幣$300起
按此了解更多
-----------------------------
英國移民、升學、就業、買樓生活資訊！
立即加入「走佬去英國 － BNO 5+1 移民資訊研究所」
來源 source: http://nextplus.nextmedia.com
|
鍾意就快D Share啦！
|
|
|