由鄭中基、張可頤主演的ViuTV劇集《暖男爸爸》，開播首星期以來獲不少觀眾、網民激讚，當中在去年經常聽到的抗爭字句、抵死貼地的對白亦令人感受至深。對於被封為神劇，監製兼導演及編劇的戚家基（Peter）表示︰「呢個係香港人嘅故事，所以要多謝香港人。」
《暖》劇播出以來有不少迴響，對此監製Peter表示︰「拍《暖》劇嘅初衷係畀香港人睇，會有共鳴，希望啲人一聽就覺得係香港人講嘅說話。呢個劇喺2020年拍，呢啲對白就係平時我哋喺街度聽到。好似聯繫咗connect咗，而家唔會仲有人講隨機應變，香港人同香港人之間梗係講be water啦，呢段時間講開嘅，就係呢啲對白。」對於網民、觀眾都喜歡《暖》劇，Peter十分感恩，他說︰「多謝所有喜歡呢個劇嘅人，你哋令參與創作嘅人好感動，我哋喺疫情中開拍，多謝劇組成員大家一齊出生入死。」
談到被網民封為神劇？他說︰「香港好奇怪，神同人只差一線，原來香港拍劇只要你講人話、唔離地，講緊啲人每日都關注到、遇到嘅事，佢哋就會覺得你係神劇。我做嘅係我經歷過嘅、朋友遇到過嘅，感覺我住嘅地方，經歷同感受到嘅嘢都擺落劇入面，如果大家覺得係神劇，我會將掌聲畀返香港人。」
有好多壞咗嘅人
除了鄭中基在大排檔憶起離世太太余香凝一幕，十分催淚外，還有演賤男Lantau的強尼，遭三名女友connect被數臭，而這幕似曾相識，令人想起曾一腳踏五船的張致恒，對此Peter謂︰「其實強尼嘅角色，香港普遍都有，甚至我身邊朋友，10個有8個都係，有咁嘅行為係因為缺乏愛，呢一點我哋參考過心理醫生，不幸嘅係世界上有好多呢類壞咗嘅人。」
談到鄭中基的角色林世榮，問Peter對方有否參與創作？他說︰「鄭中基係個劇嘅靈魂人物，佢好信任我哋主創團隊，而佢唔會干預，佢會以林世榮角度去諗，令呢個角色更人性化同真實感。」此外，Peter亦預告下周劇情的高潮位，他說︰「Crisel（姬素‧孔尚治）演嘅遊戲治療師，將於下星期出場，佢嘅出現大家要攞定紙巾；另外就係劉江叔出場，佢演鄭中基阿爸，兩人嘅對手戲大家要留意，仲有強尼同陳俞希會有感情線。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|