周星馳喜劇陪伴不少港人成長，有些人覺得他已過時，有些時下年輕人重看他的作品仍會心微笑，多年前跟他合作無間的谷德昭，講過見盡娛圈任何人企圖模仿周星馳都「冇好下場」。
周星馳的成就也許有賴於個人魅力，轉數夠快，面對不欲多談的，往往一笑置之，甚至無厘頭轉移話題，正正他是周星馳，印在觀眾腦海中「佢就係咁」，並不會覺得耍大牌廢噏，要入屋擁有這份大眾親切感並不容易。
周星馳上月遭舊愛于文鳳興訟追討投資物業「天比高」等豪宅的利潤分紅7千萬，二人對簿公堂，他連續3日出庭應訊，吸引許多fans現身高等法院聽審朝聖，公眾席爆滿。周星馳在庭內接受于文鳳代表律師盤問時，罕有把感情事和盤托出；庭外有影迷送上偶像最愛的李小龍公仔、有影迷拿着舊戲票索偶像簽名，庭外頓成「影迷見面會」，周星馳更鮮有走入人群，對記者提問，兵來將擋發揮搞笑本色，妙語如珠。
11月25日，記者問周星馳可否到法院門外讓在場記者拍照，周星馳說：「今日冇化妝。」問及他到法院覺得點，周星馳續道：「應該裝修吓！」他透露疫情下「好想飛，最想去澳門」，後來稱只是比喻，指「若澳門都去唔到，邊度都去唔到」。
休庭時，周星馳收到影迷贈送的李小龍公仔，在旁記者見狀即「嘩」一聲，他聞言問記者：「你都鍾意？」記者答謂：「鍾意！」他打趣說：「送個畀你？」此時女影迷突然問：「可唔可以打畀我?」周星馳聽畢有些愕然。有記者問有沒有卡片，他摷一摷衫袋，鬼馬地說：「你唔係以為我有呀。」
11月26日，周星馳一到場，即對在場記者說：「又係你呀！」休庭時，他主動再問在場記者：「乜而家唔係有限聚令，要保持社交距離咩？咁多人圍住，好似唔係幾好。」記者指採訪可免受限制令規管，記者再問：「你驚咩？」周星馳認真地說：「我驚呀！」他之後步入升降機企在角落，再解釋：「咁唔係幾好嘛。」
11月26日，周星馳再次到法院，記者再問有沒有卡片，他笑指明天還會再來，在場記者提他明天是周六，周星馳不甘示弱回應：「唔畀我聽日嚟？」
周星馳離開時，被問到于文鳯將事件告上法庭，對此有何感受時，周星馳面露不悅謂：「唉！唔好講呢啲嘢啦，問呢啲！」曾參選立法會的「娥姐」陳玉娥，忽然問：「你認唔認得我呀？」周星馳一臉茫然，其後他發揮搞笑本色：「化咗灰都認得你！咪以為戴咗口罩，我就認你唔到！」引得哄堂大笑。
記者問他對政治可有興趣，周稱「要時間學」，反問「你哋唔係做政治咩？」記者重申任職法庭版，他聞言謂：「法庭都有政治㗎嘛。」其後有一個女影迷送上一個獨立包裝的口罩，周星馳指着自己的口罩問：「我呢個唔靚咩？」女士連忙解釋，怕他全天作供，口罩受污染，周星馳即接過口罩並向她道謝。
有一位女影迷以普通話稱來自大陸，專程到法院支持他，周星馳問記者：「乜而家通關喇咩？」原來她在港讀書。另有男影迷想向周星馳索簽名，但周星馳未有動手，向他說「遲啲先啦」，男影迷仍不死心，遞上一張戲票票尾和原子筆，周星馳伸出雙手欲接，中途又把手縮回，稱「都係等陣先」，最終在場記者「幫口」，周星馳為他簽名，見男影迷聲稱喜歡自己的戲，周星馳認真問道：「《長江七號》第一句對白係咩？」該男影迷露出尷尬神情，答不出話，周星馳笑笑口說：「咁攞返個簽名嚟！」記者見狀問：「你記得咩？」周星馳無法回答，在場人士笑作一團。
周星馳近日因官司纏身，又搞笑考影迷電影對白，令一班對周星馳對白耳熟能詳的網民，一度掀起聽對白估戲名熱潮。你一句，佢一句！
「做人如果冇夢想，同條咸魚有咩分别？」 《少林足球》
「爭咩呀？兩樣溝埋變做瀨尿牛丸吖笨！」《食神》
「青春對我嚟講同貞操一樣重要。」《逃學威龍》
「你快點回火星吧！地球是很危險的。」《少林足球》
「導演呀！陣間我除咗熱之外，可唔可以表現多一種孤獨嘅冷？」《喜劇之王》
「死做爛做似隻雞，俾人鬧仲要開口笑，似隻雞，好好笑！」《唐伯虎點秋香》
「做咩呢個太監咁多鬚根，肯定係閹唔淨，人嚟，拖佢出去閹多鑊。」《賭俠II上海灘賭聖》
「憑你的智慧，我好難同你解釋！」《九品芝麻官》
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|