▲林夏薇贏視后獎一直惹爭議。
林夏薇今年一月初憑無綫劇《七公主》中的「顧語嫣」一角奪得《萬千星輝頒獎典禮2021》「最佳女主角」殊榮。近日忙於拍攝新劇《法言人》的薇薇，早前抽空接受無綫娛樂新聞台《Star Talk》專訪，與主持潘盈慧大談得獎感受，及入行多年來的得著。
最新影片推介：黃子華+張繼聰+陳湛文專訪
中央戲劇學院畢業
談到宣布得獎一刻，薇薇坦言當時腦子一片空白：「真係好難形容，我呢世都會記得嗰刻嘅感覺。」入行轉眼已十多年的薇薇，於北京中央戲劇學院表演系畢業，並一步步慢慢捱至今天的成績，
她笑言：「好記得當年由冇對白嘅臨演，臨時演員都係演員啦，行行企企拍吓手咁，再由冇對白到同主角有一、兩句對白咁，再由配角去到主角…所有呢啲畫面都歷歷在目，好似時間停頓咗咁。我當時上台攞獎其實好想表達畀媽咪聽，好彩我嗰時冇放棄。」
哽咽談演員初心
薇薇指當晚站在頒獎禮台上，腦子裏閃過了當年為內地劇《手機》「跑龍套」時、與當時已是內地一級演員的陳道明的互動畫面。
她憶述：「當時我係臨時演員，好榮幸可以同陳道明老師有對白，我係負責演參賽嘅選手。拍嗰時我喺台上，陳道明老師喺台下；當鏡頭調轉要拍番老師佢哋時，台上其他（臨時）演員走晒、得番我，咁我咪畀完A（反應）再畀B同C（反應）。」
豈料，陳道明主動讚她專業：「佢話：『你咁細個，都識得要留喺度畀對白。』佢嗰日加咗戲畀我，仲教我應該點樣做反應。嗰日我明白到更加要堅持演員呢個夢想，無論係幾細嘅角色，努力係會畀人睇到㗎，同埋就算唔係拍緊你，都一樣要專注。」談到演員初心，薇薇更邊說邊含淚哽咽，相當感性。
贏視后惹爭議
對於贏得視后後備受爭議，她回應謂：「個獎對於我係好嘅開始，係一種鼓勵同肯定，佢係鞭策緊我嚟緊要做好每個角色嚟到回饋觀眾。」
薇薇最後由衷表示：「其實嗰晚我好感動，我收到好多電話同訊息，有啲訊息仲要好大篇文，反而我啲朋友好擔心我，然後我因為咁先留意到原來有人咁覺得，因為嗰一刻真係太多嘢要處理。」
撰文 :TOPick柴犬出動
|
鍾意就快D Share啦！
|
|
|
