掃呢頁CODE去手機

2018年10月5日 星期五

【停藥即出事】四年前喊足7小時爆抑鬱 顏仟汶:有衝動跳出去做儍嘢 __,顏仟汶,

顏仟汶話有時情緒低落都有念頭要做儍事。(攝影:陳俊強)
四年前一個中午,顏仟汶瞓醒,佢突然坐喺屋企露台係咁喊,由中午11點幾開始,一直好悽涼咁喊咗6、7個鐘,喊到攰,喊到扯蝦,仟汶心知驚。天入黑,佢無助打畀 ...


四年前一個中午,顏仟汶瞓醒,佢突然坐喺屋企露台係咁喊,由中午11點幾開始,一直好悽涼咁喊咗6、7個鐘,喊到攰,喊到扯蝦,仟汶心知驚。天入黑,佢無助打畀一位舊鄰居傾訴,友人懷疑佢有情緒病,勸喻仟汶盡快睇醫生。



結果,仟汶肯面對,翌日去咗瑪麗醫院急症室,「我獨自去急症室,登記分流,姑娘同我量血壓,我突然又喊起嚟,姑娘好有經驗,畀張輪椅叫我坐,推我埋一邊,叫我好好休息,想喊就喊,我就喺靠牆最埋張床等候區。由中午12點等到黃昏6點,突然後面有人拍我背脊,有個男人遞我100蚊,嗰刻我覺得係咪幻覺,我就同姑娘講,姑娘就將我推開啲,又要等。我見到6號床位有個男人睇精神科,初初見醫生,講嘢都好正常,但寧舍有保安企喺度,幾個病人都係由平靜講到好激動,仲打個醫生,我當時睇到,同自己講我唔要咁,我唔係精神有問題,會唔會有一日我都會咁㗎?」



「到我埋去,醫生問我有乜嘢唔開心,佢哋問嘢好有技巧,由細個到大個,講到爹哋媽咪我喊得最犀利,我跪咗地下喊,我發現係細個家庭環境影響。醫生就開藥畀我,轉介我去精神科,每隔幾個月要定時覆診,佢哋話先調整我情緒。最成功係今年2月幫我戒甩食咗十幾、二十年安眠藥。」



仟汶講番爆喊前導火線,佢懷疑係因為家中七隻老狗逐一離世,佢傷心咁話:「七個小寶貝,一個月內,一星期咁逐隻走,o依家剩番一隻都16歲,好快可能都要送走佢。嗰排唔開心,其實我成日喺屋企時都出現好多畫面,有時我企喺露台講電話,我住十樓,我會望到自己瞓咗喺樓。另一次,我行街,對面馬路有南亞裔工人裝修,突然好大大聲嚇咗我一下,畫面係有個玻璃門倒下壓死佢哋,我好驚走咗去。」醫生聽過仟汶形容呢啲畫面,斷定佢患上抑鬱症。



仟汶知道醫治抑鬱症要長年鬥爭,佢選擇睇公立醫生,佢話:「醫生話每個人大腦正常時,係一棵荗盛樹葉,但當腦退化時,會變咗啡色,即唔健康多過健康,會諗好多負面嘢。」醫生就開藥畀仟汶穩定情緒,視乎病情,嚴重時藥量多達4粒,最近已減半,晚間有一粒更可幫助佢入睡,所以就不用食安眠藥。



醫治抑鬱症絕不可停藥,仟汶過去四年接受治療期間,兩年前因為到廣州開工,她偷懶沒去覆診兩次,就出事了,「停咗個多、兩個月藥,我排期排唔番,到最尾,我先生陪我去求醫生畀期,政府醫院臨時真係冇籌,我去到又失控係咁喊唔停,病情返番去起點之餘,仲差咗。嗰度啲醫生見我唔掂,馬上叫白車送我入院接受治療,畀藥我食駁番。抑鬱症患者千祈好自己停藥,醫生仲有開鎮定劑畀我,一日食三次,有需要先食,但呢四年我食唔超過十粒。」



仟汶近年事業停滯,同時又面對離婚打擊,佢話:「呢年幾兩年,工作上、感情上,我好down,扯咗你好多嘢出嚟。」仟汶直言有時情緒低落時,「左腦係天使,右腦係魔鬼,魔鬼出咗嚟,天使會走出嚟同佢打仗,睇邊個鸁,如果魔鬼鸁,我咪喺屋企暱埋喊發洩,我係喊包,好悽涼、好陰功咁喊,喊到頭爆炸,眼腫又瞓唔到,喊完會好啲。有時激動會開車出去兜吓,突然好想走出去大嗌,出去淋雨。」



「有衝動跳出去做儍嘢,我戒咗安眠藥,但屋企仲有,有好多次有呢個念頭拎出嚟啪,乜都唔想理,唔想煩,嗰一下我覺自己甚麼都不是,我喺唔喺度都冇影響,冇存在價值。離開咪唔使辛苦,冇人明白我,事實真係冇人明,好怕聽到朋友話『明㗎明㗎』,佢哋唔會明。」佢話兩周前發生了一些事又唔開心,「我諗咗好多方法唔去諗件事,離開香港,但唔開心喺裏面,去玩只係嗰一刻好開心,始終要返屋企,要一個人面對,唔開心係一個結,要自己去打開。我唔開心唔會出門口暱埋,唔想見人,唔想講嘢,乜嘢都唔想,甚至喺屋企唔想食嘢,唔沖涼、唔洗頭,瞓就瞓,一pat嘢咁喺度。唔開心盡量有啲嘢畀自己做,一個人喺屋企乜都唔做係最大件事嘅。」



問到仟汶唔開心時點去抒緩?佢話:「喊囉,不過喊完件事始終都喺度,等自己適應,喊第一日可能十級,第二日降到八級,第三日就六級,慢慢喊少咗咪冇事,等時間。」仟汶也會跑出去踩roller減悶氣,訪問當日,佢帶齊roller鞋出動,「踩roller令我諗起好多細個讀書嘅嘢,健康運動,我久唔久會嚟攞住對鞋游吓游吓出一身汗。以前細個,我試過跟同學喺紅磡踩馬路踩上紅館,依家諗番危險。」仟汶覺得着上roller鞋街出去一下感覺好爽,但佢亦曾曾試過着好鞋,心情唔靚就唔踩。 





採訪:比華利

攝影:陳俊強

攝錄:廖達燊 林德雄

場地:The Stadium(CWB)



精選娛聞,喺晒《娛果》

http://fb.com/appledailyent



顏仟汶話有時情緒低落都有念頭要做儍事。(攝影:陳俊強) 顏仟汶話踩roller衝出去一刻好爽。 顏仟汶話踩roller衝出去一刻好爽。
顏仟汶嘉歡獨自駕車到公園踩roller。

顏仟汶嘉歡獨自駕車到公園踩roller。
每次踩roller,顏仟汶會自備凳仔換鞋同休息。

每次踩roller,顏仟汶會自備凳仔換鞋同休息。
面對抑鬱症四年,顏仟汶積極面對,接受治療。

面對抑鬱症四年,顏仟汶積極面對,接受治療。
平日顏仟汶都係好開朗。

平日顏仟汶都係好開朗。
顏仟汶離婚後,獨自生活,自力更新。

顏仟汶離婚後,獨自生活,自力更新。
顏仟汶呼籲所有抑鬱病者要保持心情輕鬆。

顏仟汶呼籲所有抑鬱病者要保持心情輕鬆。
顏仟汶早前旅遊,一嘗騎馬滋味。(fb圖片)

顏仟汶早前旅遊,一嘗騎馬滋味。(fb圖片)

鍾意就快D Share啦!