劉倩婷自認冇陳茵媺咁勇敢。
堪輿學家李丞責與同港姐冠軍太太劉倩婷出席活動，講到好友陳茵媺早前生日，佢話大家已經一齊慶祝：「好開心，我哋四個一齊慶祝，送咗對耳環同私人物品畀佢。」提到陳茵媺去旅行大晒身材，劉倩婷好羨慕佢哋咁恩愛，又叫身旁嘅老公多啲陪佢去旅行，問到會唔會學陳茵媺咁晒身材，佢話：「我身材冇佢咁好，冇咁勇敢。」李丞責即「保護」老婆：「着潛水衣得唔得？你生多兩個就好似佢咁好身材。」劉倩婷話依家忙緊搞搬屋，即將搬去南區同陳茵媺做鄰居，問係咪想對親家，李責丞話：「等小朋友自由選擇，依家做住朋友先。」
至於佢哋安排愛駒「歡樂從心」退役，李丞責話：「心情冇受影響，我哋不嬲都愛錫動物，所以先決定送佢去澳洲休養生息。」劉倩婷都希望日後將來可以去澳洲探愛駒。
來源 source: http://hk.on.cc
|
鍾意就快D Share啦！
|
|
|