ViuTV在2018年製作王牌人氣節目《全民造星》成功打造兩隊男團MIRROR和ERROR，拍劇、唱歌、廣告的工作接踵而來，當中以姜濤最為矚目，可說是賺到金錢又賺到名氣。2019年的《造星II》，吸引不少素人參與，希望能夠成為姜濤2.0，但《造星II》冠軍吳啟洋（Phoebus）卻不似預期，相隔大半年後才獲ViuTV簽為旗下藝人，他坦言曾經為工作迷惘過，因疫情關係將一切計劃延遲。直至兩、三個月前，ViuTV與Phoebus終於動筆簽約，但就沒有簽亞軍張天賦及季軍李祉均，反而選擇簽了《造星II》第四名的歐鎮灝（George） ，以及30強就止步的葉振弘（Marco）。
未簽約時，或多或少都會感到徬徨，幸好獲得公司給予不少演出機會，裝備好自己，Phoebus亦認為節目結束不代表一切，他說：「只不過係我人生中參加過嘅一個節目，我慶幸自己攞到獎，但係冇話贏咗就一定要簽我，我冇呢個諗法。迷惘都會有，但喺呢個過程中，我都有好多機會，拍過《太平紋身店》、上過《Chill Club》唱歌，所以呢段時間都充實。」遲遲未動筆簽約，主因是疫情關係，Phoebus續說：「傾合約唔係單方面，當中涉及老闆、各方面配合，可能有一方喺其他國家，要花好多時間返香港，我諗係因為咁樣先延遲咗。」
George承認有一段時間迷惘，幸好與Phoebus在《造星II》後，接了一個綜藝節目，藉此可以儲經驗，而且亦有學唱歌和跳舞去裝備自己，加上曾接拍過廣告，所以經濟方面還好。至於在《造星II》30強止步的Marco，當時已知自己有很多不足的地方，「我要不停去練習，因為我個心仲想喺呢條路行落去，我興趣係唱歌、跳舞同拍戲，《造星II》之後我都有參與《太平紋身店》，呢個係我第一個機會，有酬勞又可以攞經驗，見到自己可以喺呢條路行返好開心。」
問到George和Marco有甚麼優勝之處？George表示獲公司跟他簽約，當時真的很開心和驚喜，機會就在面前，沒有理由不要，「我明白自己有好多不足，但始終有機會嘅時候，不如攞住先，然後喺未來條路去不斷增值自己，其實公司冇講點解會揀我。」然後他笑笑說：「我諗係同Marco年輕啩！」George今年21歲，Marco今年19歲，的確青春無敵！24歲的Phoebus忍不住搶着說：「即係我好老？」George急忙補鑊：「唔係，你都好年輕呀！」Marco笑指：「我哋3個嘅溝通方式就係咁樣。」Phoebus笑謂：「George係因為靚仔。」George笑住反擊對方：「我覺得唔係，公司唔會咁膚淺，公司一定睇到有啲嘢，但我又睇唔到有啲咩！ViuTV睇人真係有一手，我唔係讚自己。」
在《造星II》時，Phoebus曾經講過「我唔係一個花瓶」，問他有否想過與姜濤爭做ViuTV一哥？Phoebus說：「我諗每個人嘅際遇都唔同，自己都有啲天時地利人和嘅關係，疫情問題將所有嘢延遲，我唔會去比較，相信佢（姜濤）喺呢段時間都好努力喺唱歌同跳舞方面，而家佢又拍劇。同時間我都會好努力去裝備自己，專心做好手頭上嘅工作，我都好想有好好嘅作品畀大家，不論綜藝或者拍劇，甚至係音樂方面，呢個就係等公司安排。」會否擔心公司將資源分薄？他續說：「公司都有畀機會我哋，姜濤都好努力，做好多嘢去幫到公司，希望自己喺未來都有多啲作品，多啲收視，公司都會再畀多啲機會。」Marco則說：「暫時呢一刻，我已經知足，公司好支持我哋，我應該把握同珍惜眼前呢個機會先，我唔會想同佢哋競爭，因為大家都係師兄弟，我唔明點解要競爭或者比較，MIRROR係師兄，佢哋會照顧我哋，尤其係我熟識嘅Jeremy同Frankie，佢哋都好睇住我，所以其實我係好多謝佢哋。」
簽約後，自然要接受工作的委派，Phoebus、George和Marco接拍10集的真人騷《大海男兒》，訪尋香港隱世的海島景點。這個是三子出道的首個節目，雖然感到一定的壓力，但幸好他們有正能量，互相鼓勵，Marco表示會珍惜公司給予的機會，George說：「初初收到節目邀請，我係驚喜，因為呢個導演拍過《花姐ERROR遊》、《美女郊遊遊》，呢啲係話題性高嘅節目，我係擔心自己做得唔夠好，始終係我第一次拍綜藝，仲要係真人騷，可能驚自己有好多不足，不過拍落去係舒服，台前幕後冇畀我哋壓力。」
對於很多網民將該節目視為男版《美女郊遊遊》，會否擔心有比較？Phoebus說：「大家都係旅遊資訊性節目，都係介紹香港唔同嘅景點，而且幕後班底都係一樣，所以製作方法都會相似，但內容就差好遠，女仔都係行山挑戰，但我哋嘅挑戰，喺體力上、危險性會再高啲。」提到難度高的挑戰，George印象深刻是攀爬一座如懸崖一樣的山，「呢座山比較尖啲，可以行嘅地方係唔多，加上我本身有畏高，只好硬住頭皮去做，因為冇退路，始終都驚，跣一跣就會有意外。」Marco則難忘最驚險的一個次，「徒手游過一個好大浪、好多暗湧嘅一個洞，基本上被浪打中，自己撞埋去礁石會損手爛腳。」Phoebus表示還要挑戰峻峭山路，兩邊都是懸崖，稍有不慎差錯腳就一命嗚呼。由於挑戰內容危險性極高，ViuTV替他們買重保險，令他們放心一試。
撰文：黃曉妍
服裝：JACK & JONES
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
