胡杏兒今個聖誕真係夠晒幸福喇！
恭喜恭喜！育有2子嘅胡杏兒趁住今日聖誕佳節喺網上報喜，宣布佗第3胎呀！佢上載一張坐喺聖誕樹前手捧巨肚嘅獨照，留言：「我來自一個有兩個姐姐的家庭，從小就體會到三姊妹的好處，一直覺得如果能有3個孩子會是一件特別美好特別幸福的事。2020年的聖誕節告訴大家，願望成真了❤️」
而老公Phil就透露老婆參加大陸綜藝節目時，拒絕畀人知道佗BB，因為唔想有「特權」，如常咁工作，大讚佢係超級老婆、超級媽媽、超級新抱、超級職業女性及演員同埋超級靚呀！唔少星媽包括陳敏之、陳凱琳等都留言恭喜佢哋！
杏兒回覆指今次懷孕係計劃之內，生仔定女都冇所謂，而預產期就係下年年頭、年中：「聖誕節係一個同家人一齊歡度嘅開心日子，所以特別揀呢個日子同大家分享呢個開心消息！其實一直以來都希望有3個小朋友，依家如願以償都非常感恩。今次懷孕都算係計劃之內，生仔或生女都冇所謂，最緊要健康。預產期大約明年年頭、年中左右。」
佢仲自爆有晒經驗，佗B冇覺得特別辛苦，之前工作時都冇人發現佢大肚添：「之前喺內地工作都冇同劇組透露懷孕一事，自己唔想有任何特權。我希望公平、公正下比賽，最後都攞到好成績都好開心，而且有BB同二仔Ryan一直陪住自己！因為已佗第3胎，所以好有經驗，冇覺得特別辛苦，基本上同其他懷孕女士一樣，工作時都冇咩影響。而每次佗B都剛巧有工作在身，今次都唔例外，早已適應。而懷孕初期都冇特別現肚，冇人察覺！感謝BB好乖，我一直有喺內地做檢查，好安全、好順利。但現時疫情下都會分外小心。祝大家聖誕快樂！」
據知，杏兒已安全返港，目前正在隔離中，31號仲會出嚟見人。
來源 source: http://hk.on.cc
|
鍾意就快D Share啦！
|
|
|