估唔到買餸都可以變成拳頭交。讀者冼女士噚日(25日)下晝5點半喺大圍街巿外圍買餸期間，睇到一對港人母女同另一名操普通話嘅女人，因為街頭碰撞問題嘈起上嚟，雙方一言不合，普通話女人一嘢捉住港女件衫大鬧，對方大叫縮手，繼而就兜腳踢落對方個小腹，然後港女阿媽見到，加入戰團用拐仗加多一招「鐵拐李」送畀對方。
冼女士話當時普通話女人一直緊捉港女件衫邊唔放，又向身邊人大叫「打人呀」，嗰對母女試過夾手夾腳屈住對方手指想鬆人，圍觀途人一直喺度食花生，其後冼女士睇唔過眼，打999報警，警察嚟將三女分隔，經調查拉晒三人上警車，話要返差館錄口供，成件事先可以拆得掂。
冼女士話今次事件起源，來自大圍街巿外邊不時有擺街檔，價錢比街巿平，加上臨近傍晚會再降價，有啲瓜菜平到10蚊有兩三盤，吸引唔少街坊幫襯，不過呢條路好窄，食環署小販隊又唔係日日巡，如果加上人群同街檔堆埋一齊，碰撞難免，佢估計嗰度一個月起碼有一兩次嗌交，但打交都係第一次見到。
警方回覆話一個35歲姓林女人同一個39歲姓李女人，當日下晝五點喺大圍街巿外發生口角，林女腳踩李女腹部，對方則施拳還擊，之後林女嘅64歲母親用拐仗毆打李女，警方到場後以涉嫌公眾地方打架拘捕三女，其中兩女報稱受傷，被送往威爾斯醫院敷治。
查返法律，根據第245章《公安條例》第25條，任何人在公眾地方參與非法打鬥即屬犯罪，可被罰款港元5000及監禁12個月，如果為咗爭幾條菜或膊頭撞膊頭就大打出手，你話係咪好無謂呢？
你敢爆，我敢獎！ 即Call《蘋果》24小時爆相爆片熱線：63836568
|
鍾意就快D Share啦！
|
|
|
