播完《巨輪2》之後，大台緊接播新劇《幕後玩家》，未播出網民先興奮，一來係因為三個小生落場hyper——晚晚有得睇黃宗澤、張繼聰同蕭正楠，仲有車，有女，紙醉金迷，嘩，滿足晒仲發緊夢嘅香港人。套劇係講記者出身黃宗澤、同張繼聰、蕭正楠三兄弟(唔係親生嗰隻)加入公關公司The Rainmakers組成「鐵三角」，縱橫公關界，仲捲入富商家族爭產風雲，因為佢三個俾地產商千金成雙(黃翠如飾)睇中，借三兄弟之力幫佢個廢青細佬陸永(其實佢應該都唔算係「青」喇啩？)重奪家族地位，黃宗澤仲一步一步成為嗜血嘅「造王者」，「富貴之門」為佢而打開……網民睇完trailer，議論紛紛，有人問:「做公關揸林寶，做客咪揸穿梭機？」做公關真係搵咁多？係㗎！不過唔多！
其實好多富二代、社交名人都自立門戶搞公關公司，包括已故全國政協副主席安子介外孫楊鼎立，仲有趙世曾千金趙式芝、家族生意市值逾30億嘅JC，仲有賭王千金何超瓊等等，真係個個都好有米0架！【趙式芝】
趙式芝除咗開公關公司外，仲開埋模特兒公司，趙式芝曾謂當時父母並不支持，媽咪仲覺得做公關好似有求於人，要「搲爛塊面」咁，又有啲虛偽，但趙式芝不認同。當時佢仲租爹哋嘅物業開office，堅持俾全租。沙士嗰陣真係頂唔到喇，先至肯接受爹哋嘅免租優惠，但就將公司搬咗去士多房。後來趙世曾要求個女返卓能集團幫手，趙式芝就將公關和模特兒公司一併結束。【富二代JC】
有人走自然有人加入，包括呢位富二代JC。係仔唔係女。一頭gel得燙貼嘅髮型、baby face面孔成為個人標誌嘅德祥地產太子爺張宇成（Jonathan），人稱JC，今年27歲，美國帕森設計學院畢業，修讀Design& Management，2014年創立公關公司Buzz Concepts Group，於公關界大展拳腳。喺佢身邊嘅，都係何超盈、曾昭怡、邢嘉倩同陳柏熹等死黨，在社交圈非常活躍，曾經與Loewe、Fendi、Dolce& Gabbana及LV等大品牌合作。德祥地產市值逾30億，老竇打好晒個江山，但JC仲未諗過要做接班人。JC真係一個好認真嘅人，話說Loewe係佢JC第一個客，JC為咗表示捧場，一口氣買下前任及現任設計師嘅黑皮褸。冇出，邊有入？【何超瓊】
講到公關界無人不識嘅，肯肯定係何超瓊。喺美國加州Santa Clara大學主修市場及國際商業管理嘅何超瓊，畢業回港後與富家子弟阮偉文、黃英琦等於88年開Occasions（天機公關）；後來阮偉文將股份交俾當時嘅另一半、中信泰富主席榮智健姪女榮文蔚，天機變成女人天下。05年，榮文蔚表妹鄭詩韻入股天機，佢仲用咗短短三個月、成立財經公關公司眾智企業傳訊（Trimaran），公司如今改名為Mazarine Asia Pacific，鄭詩韻擔任行政總裁。千金小姐做CEO，要唔要捱？鄭詩韻06年接受《蘋果》訪問時稱:「我細個都算俾家人寵壞，物質方面亦好豐富，不過創業比以前打工壓力大，比舊年瘦咗15磅，爹哋唔捨得我捱到殘晒，面色唔好。以前日日食燕窩，不過好似冇乜用，所以父母特別買冬蟲草磨粉畀我沖水飲，增強免疫力。」自細俾屋企人就慣，性格「率直」，唔鍾意就say no無彎轉，但鄭詩韻話做咗老闆之後，開始會聽人意見:「依家做服務行業，要學識聽客戶意見，待人處事都成熟。」嗯嗯……【丁子高】
丁子高，VRF組合成員，楊千嬅老公。多年前有人傳佢為$追求樂壇天后楊千嬅，其實真正有米嘅，係丁子高，佢先至係富二代。丁子高爸爸丁永方係上海大業主，上海三間製衣廠同一間紙箱廠，身家億億聲，但丁子高唔想承父業，03年加入IPS公關公司，2011年自立門戶成立RM Workshop，手上有唔少大客戶。依家喺海南島舉行觀瀾湖世界明星賽，就係由丁生間公關公司負責。
|
鍾意就快D Share啦！
|
|
|