掃呢頁CODE去手機

2019年5月25日 星期六

娛刺撈飯:兩女天生大方難自棄!王敏德呻苦慘過打仗 __,王敏德,

兩個女咁搞法,王敏德就成了「苦」爸!近日唔少人睇完王敏德兩位千金王曼喜同王麗嘉,輪流喺ig派嘅性感裸照「軍糧」後,除咗借用中美貿易戰嗰句「不願打,不怕 ...


兩個女咁搞法,王敏德就成了「苦」爸!


近日唔少人睇完王敏德兩位千金王曼喜同王麗嘉,輪流喺ig派嘅性感裸照「軍糧」後,除咗借用中美貿易戰嗰句「不願打,不怕打,必要時不得不打」,係咁J(Jealous,妒忌)呢兩位身材出眾、基因優良嘅新紮性感尤物之外,亦都戥天下間有女嘅父親慘慘豬,因為教導女兒真係同打一場漫長嘅戰爭冇分別。

聽吓王敏德點回應兩個女「天生大方難自棄」,已經隔住個mon都感受到嗰份唏噓,佢話:「Getting worse and worse(情況愈來愈差),做爸爸好辛苦。有朋友拎啲相問係咪我個女,我話:『係呀,使唔使望呀?』鹹濕佬呀!」反觀同場「阿叻」陳百祥不知幾咁輕鬆,以「That's good、睇開啲、that's natural !」嚟形容成件事,真係抵死得佢,搞到王敏德只能以「Good for you,not for me」嚟打圓場!

高挑身形滲西模味

其實王敏德已經睇得好開,細女麗嘉Post咗張一絲不掛嘅全裸出浴照冇耐,大女曼喜又Post一張上身全裸,只係僅僅遮剩波邊嘅相。雖然兩位千金嘅顏值各花入各眼,但毫無疑問佢哋唔少相都影得幾有美感,身形雖則高大阿凡達咁款,依然不失性感,仲隱約有一陣睇緊西方Top model嘅錯覺添。所以王敏德呢頭呻完,嗰頭都即刻話「Proud of麗嘉」,又讚佢跟媽咪做Model做得好。畢竟時代唔同,莫講麗嘉係Model,有職業上嘅需要,即使係個素人,呢種「天生大波難自棄」嘅風氣,網上早就氾濫,醃到眼盲。

不過,王敏德身為兩女嘅父親,擔心都係人之常情。正如兩個月前美國有個媽媽向聖母大學發公開信, 話對愈來愈多大學女生將Leggings(緊身褲)當面褲着, 令下體線條盡現,表示憂心。結果惹來大班U女大肆反擊,發起「Leggings自豪日」(Leggings Pride Day)。呢個就係有女性自願穿上緊身貼身褲,將下體擠出有如駱駝趾形狀,再自拍向朋友挑機「Camel Toe Challenge」嘅世代,亦即係上一代人同埋冇裸露癖人士所唔明白嘅世代鴻溝嘞!

只鍾情肉體卜卜脆

既然戲都拍過,呢個世界有人透過打場麻雀嚟選新抱、揀女婿,咁就不妨以打麻雀嚟「聲東擊西」了解人性。少不更事嘅後生女唔知到惜肉如金嘅可貴,係都要露體,係都要着Leggings,即係好似打麻雀明知會有出銃被人食嘅危險,但係都要將隻西打出嚟,就算唔被人食,被人碰、被人槓都蝕章

借用同王敏德個名只係一字之差嘅愛爾蘭已故作家王爾德(Oscar Wilde)一句說話:「我不願意暴露我的靈魂,讓那些好奇的凡夫俗子瞧個沒完。」喺香港,猥瑣佬對靈魂冇興趣,只鍾情肉體卜卜脆。作家老舍嘅《駱駝祥子》話:「真正美麗的人是不多施脂粉,不亂穿衣服。」時下後生女就化行晒妝、不穿衣服,《駱駝祥子》已經唔興,「駱駝腳趾」(Camel Toe)先至吸睛。世風日下,爹親、娘親,不及網民畀心心;裸露癖、窺淫癖喺網上各適其適,你話教女係咪辛苦過打仗吖!




來源 source: http://hk.on.cc
鍾意就快D Share啦!