樂隊Mr.的bass手Dash在昨天父親節突然於社交網上載BB超聲波照公布做爸爸！Dash接受東網電話訪問，他大方承認笑說：「係呀！」原來Dash去年年初已跟拍拖4年的女友Joana求婚，還秘密簽字結婚了！
「點都要跪一跪」
Dash的太太Joana是澳門人，對方從事飲食業工作，兩人拍拖多年，他一直有結婚打算：「舊年年頭我喺澳門同佢求婚，當時得我哋兩個，我唔想搵大班人畀surprise嗰種！（有冇鮮花、戒指同跪低？）都有，點都要跪一跪！（佢有冇喊？）佢冇喊，不過我哋兩個嘅相處好鍾意搞爛gag，求婚幫佢戴咗戒指後，我話唔捨得隻戒指，佢戴咗即刻走，因為驚我攞番。」Dash透露隻求婚戒指價值5位數：「合理嘅，因應自己能力，我覺得誠意緊要過幾多卡。」
出年補擺酒
Dash表示求婚後，兩人在2017年的下半年於外地簽字註冊，但他希望低調保留私人空間，他說：「我同太太都有共識，唔想講喺邊度註冊，當日都係好簡單簽約，冇着任何婚紗禮服，有通知朋友，屋企人知我哋求咗婚都成日問幾時結婚，我就話我哋有分數㗎啦。」他決定待BB出世後，才計劃明年在港或澳門補辦喜酒，因為不想太倉卒。
老婆Call爆機報喜
他透露太太已有6個月身孕，預產期在9月左右，他說：「依家乜都唔諗，等BB平平安安健康出咗世先。」Dash笑言當日太太發現有喜，他正跟Mr.其他成員開會，當時放低了電話，接近會議尾聲，驚見有幾個太太的miss call，還以為太太有事，其後才知道太太報喜，他笑說：「嗰刻我睩大眼擘大口呆咗，好想將呢個喜訊第一時間通知阿榮（他的孖生細佬），因為阿榮都喺度開會，當時我忍住冇講，開完會阿榮車我，等我哋兩兄弟我就即刻講，佢開心到錫咗我幾啖。」之後他也有通知成員自己快做爸爸的喜訊，他說：「今年係Mr.入行十周年，又有自己小朋友，意義重大。」他亦有朋友夫婦跟他差不多同時間有喜，笑言四個新手父母無從入手，大家不時上網找資料研究一番。
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|