在劇集《使徒行者3》中飾演警務處助理處長Madam Chan的關寶慧，得到不少網民讚賞有台型，英氣十足，不要看她外表似很硬淨，其實關寶慧曾經歷長達10年的迷惘期。
今年54歲的關寶慧，1990年入行，一直有不少機會的她，當年更被TVB力捧，不過她堅決外闖，直至95年事業不再如過往平坦，令她開始胡思亂想，繼而患上抑鬱，她說：「有幾次幻想過跳樓，但只係幻想，其實係危險嘅，我覺得都好得人驚。」
關寶慧表示自己當時整個人充滿負能量，她認為：「加上我當時又主持一啲靈異節目，所有事情累積嘅能量其實都好差。然後自己就會經常瞓覺，因為唔開心，經常都需要瞓覺，攤喺床唔想起身。後來睇番一啲書，原來抑鬱症有啲徵狀都係瞓覺，我諗應該係咁樣，總之會由天光瞓到天黑，覺得張床就最安全。」
- 相隔十八年，關寶慧重返TVB拍《使徒行者3》，她自言十分開心。
朋友覺得我似撞邪
朋友覺得我似撞邪
睡覺逃避現實，她指曾經有一年的大年初一，由早上睡至晚上七時也不願起床，直至好友袁詠儀來電吵醒她。現在回想，她自言非常感激身邊一班朋友不離不棄：「係呀，阿靚係其中一位，佢哋好關心我點解會咁樣，會約我食飯，佢哋都好好。」除了阿靚，關寶慧最感激還有同屬演藝學院出身的好友劉玉翠，那段時間，劉玉翠猶如到訪老人院般定時探訪，一直叮囑她不要放棄，她憶述：「平時本身唔係咁樣，點解而家會變成咁樣，就開始覺得自己應該要行番出嚟。當然都有朋友提醒過我，但當年抑鬱症都唔係太普遍，當時朋友只係覺得我似撞邪，叫我去搵師傅、拜神。我諗吓朋友對我咁好，屋企人亦一向對我好好，點解自己會變得咁怪異呢？於是的起心肝，有一日覺得自己唔可以再係咁樣。」鮮有跟朋友傾訴心事的關寶慧，自從走出陰霾後，明白到與人溝通的重要，尤其是家人，她透露：「家姐哥哥都好錫我，我怕佢哋擔心，所以以前唔會特別同佢哋分享。因為佢哋都有自己家庭，我就只係一個人，同埋始終演藝事業唔係佢哋接觸嘅行業，佢哋全部唔係呢一行，變咗會覺得不如自己想辦法解決。但咁多年之後，我覺得應該多啲同屋企人、朋友去傾，否則真係好容易鬱死。」
有點變冇點
有點變冇點
在事業低潮時，關寶慧透露更遇過本來拍攝的一部2B電影，正式上映時竟變成三級片，連海報也删走她的三點式泳衣，變為全裸，她說：「張海報掛喺總統戲院，我行入去睇吓，覺得好好笑，咁奇怪，點解有人會無點呢？」海報被加工，她覺得荒謬兼好笑，但同時亦因為被騙而憤怒。還有一次拍雜誌封面，她也試過被人在相片上加工：「我見之前湯記（湯寶如）影過呢本雜誌，拍得好靚，用一堆花遮住重要部位，我覺得好靚同性感，到對方搵我影時，然後講講吓就提議我著泳衣，之後叫我上去公司揀相做封面，跟住我喺見到本書出街，嗰封面唔同晒，佢喺泳衣裡面加番一點上去。呢件事我好嬲，之後仲要搵唔番嗰個人，可能當時無人幫到我，所以我就好唔開心。」不過能夠笑着分享當年往事，不用多說，今天的關寶慧已經重拾正能量，經歷十年沉淪。18年，她更憑《她媽的葬禮》成為劇后，一吐烏氣，她分享：「人生係會有高高低低，我當然希望時間可以短啲，唔使咁長同埋有咁多事情發生。而家希望喺電影同電視劇方面都可以攞獎，咁樣我就好開心同滿足。」
採訪：肥A
攝錄：Steven Wu
髮型：Zanki by BHC hair& barber
- 關寶慧與好友劉玉翠合作舞台劇《她媽的葬禮》。
- 關寶慧的三十年演藝生涯中，終憑舞台劇獲首個獎項，演技被肯定，她也激動落淚。
- 18年憑《她媽的葬禮》成為劇后，一吐烏氣。
- 海報被加工，她覺得荒謬兼好笑。
----------------------------
按此訂購「壹週刊 X 勁揪體 2021 和你壹起撐住香港」月曆
----------------------------
守住新聞自由 和你撐壹週刊計劃 每月港幣$300起
按此了解更多
-----------------------------
英國移民、升學、就業、買樓生活資訊！
立即加入「走佬去英國 － BNO 5+1 移民資訊研究所」
來源 source: http://nextplus.nextmedia.com
|
鍾意就快D Share啦！
|
|
|