2020年12月17日星期四

【頭條獨家】睇好葉巧琳奪《造星III》冠軍顧定軒10強止步鐵證冇造馬 #顧定軒

睇好葉巧琳奪《造星III》冠軍顧定軒10強止步鐵證冇造馬

《造星III》10強止步的顧定軒，鐵證了比賽冇造馬，而他更睇好葉巧琳奪冠軍。

全城追睇熱爆的《全民造星III》，本周參賽者進入20強殺入10強個人對決，首位被淘汰的參賽者是知名度同人氣同樣高企的顧定軒（Zeno），不過輸畀被喻為「最強對手」的葉巧琳（Mischa）絕對是雖敗猶榮，網民紛紛幫Zeno打氣。Zeno同《頭條日報》講輸得心甘命抵，自認私心的他睇好Mischa奪冠，更笑指總決賽會拉埋Banner幫對方打氣。Zeno呢期確實好紅，除咗《造星III》仲有孭飛劇集《男排女將》表現突出，因兩個節目同時間推出，即觸動網民神經認為他入圍《造星III》有造馬之嫌，習慣對負評照單全收的Zeno，呢次堅唔開心，「真係冇諗過人哋會咁諗，我係靠其他先可以做到。」他認為今次被foul正好替他平反，剝咗網民棚牙。撰文：杜淑霞攝影：李維隆髮型：[email protected]the attic化妝：mon場地：夕拾x閒社

Zeno承認自己落敗除了歌藝，同自己性格不愛走到最前有關，他覺得這方面同Mischa好相似，「我鼓勵佢嘅時候，好似鼓勵緊自己。」

被《造星》洗禮後，Zeno對未來工作更有信心，「我唔怕接受多啲挑戰，我ready㗎」

對於《造星III》10強最後對決，Zeno坦承最不想面對的對手就是Mischa，並非對方實力強，因自演出《給十年後的我》大家認識加深，「知道對方好多秘密，所以當我哋抽到對方嘅時候，即刻望住對方，已經想喊，我好唔想對佢我覺得佢係最值得入十強，雖然我唔係想認輸，但係我佢入圍嘅話，佢可以行到去最後，我寧願自己幫佢行上去。」

Zeno認為唯有輸畀Mischa才會心甘命抵，「因為佢已經係星，佢更加應該要畀大家見到，我自己一個更加全面嘅星，但係仲有好遠嘅路，我覺得佢係時候因為佢真係好多年，佢話當畀自己最後一次機會，我覺得係呢一次呢個世界唔好咁樣對待佢佢嘅歌同音樂係應該畀大家知道多啲。（帶埋你嘅精神攞冠軍？）我希望係，大家都知我私心佢。(佢知唔知？）佢知，我好直白同佢講，你要贏番嚟！（示愛？）唔會，佢已經有個好好嘅對象，我冇機會哈哈！」

望拜「爸爸」「媽媽」為師

演出機會多和知名度高的Zeno，參賽以來一直被質疑目的，他坦承一直都有睇大家留言及負評，「大家都係好中肯，網民冇需要去避忌同包裝，係最真實，呢啲就係我要知道，我有追post，知道吓大家點睇我嘅表演。」不過當中都有令Zeno感不快評語，「係大家覺得我係造馬，因為我有劇集上緊，我已經有一定嘅知名度，我先可以留低。我真係冇諗過人哋會咁諗，係靠其他先可以做到呢一刻嘅我，不過我消化完呢類型comment又成長咗，終歸都係你做得唔夠好，如果你做得好，人哋唔會咁講。」現在Zeno十強止步正好平反沒造馬，「都係，同埋過程入面你知道唔係㗎嘛！由知名度先可以入嚟，後尾大家好似見到我有進步，有啲好嘅comment。」

現在Zeno睇番覺得《造星III》好似跟《男排女將》有種特別關連，「好似兩樣有interaction，睇『阿King』（他飾演角色）又好似係《造星》嘅我，去追夢同埋突破嘅我，劇入面唔係條件好有天分嘅運動員，某程度《造星》嘅我都係。」完成了《造星III》後，直言已斷六親的Zeno，會爭取時間陪伴家人，特別是頭號鐵粉嫲嫲，之後他仲想繼續進修戲劇和唱歌，「阿祖（梁祖堯）唔介意想再跟佢學戲，繼續上佢堂，同埋繼續食佢煮嘅飯，媽媽（阿祖）佢真係超級好，我哋好幸福，爸爸（二汶）就係心靈上嘅輔導同鼓勵。喺音樂上可唔可以跟二汶學，二汶得唔得閒？收唔收徒弟？」後期A組的參賽者對於林二汶和梁祖堯照顧得無微不致，早已改口稱他們為「爸爸」和「媽媽」，問到Zeno係咪當兩人為師傅，他更大膽話：「係呀！唔走㗎除非佢哋遺棄我哋，唔好棄養呀，領養不棄養㗎嘛！」