早排憑ViuTV節目《美女郊遊遊》，一招三點式行山的震盪綽頭，令Double S兩位美女沈殷怡同陳欣妍hot爆。
身材澎湃、轉數快，又唱得的沈殷怡，不是普通「空殼」咪神一名，原來有家底,、有學歷，爸爸大有來頭。
雖然訪問時她沒透露父親身份，但本刊收到風，沈父是大狀沈仲平，16年退休前是律政司副刑事檢控專員，首席政府律師，代表政府檢控前特首曾蔭權，及協助處理轟動一時的前政務司司長許仕仁貧污案。她在父母悉心栽培下，成為法律碩士，一心想她接父捧做律師，怎知沈殷怡顛覆栽培，轉做娛圈，她說:「爸爸差不多半年時間無同我講嘢。」難怪！
這位DSE獲取4個5***的高材生，從小有大狀爸爸為她鋪好青雲路，高中後到上海復旦大學讀法律，畢業後返港在中大修讀法律碩士。曾在律師樓當上一年實習生，但當時23歲的她，決定第一次對家人起義，自己的路自己決定。
「坦白講律師樓實習生工作，對我而言真係好悶，所以先會有轉行呢個念頭。爸爸專打刑事案，我係做民事，當時處理嘅民事案都係合約居多，而所有合約其實都係差唔多。我每日都好頹廢，返到公司不斷修改文件，然後就收工，從來無型過，哈哈！只有失望，所以當時想轉工。」煲得港劇多，以為似《律政新人王》角色般刺激。 下了決定，想好「陳詞」，就一鼓勇氣跟大狀爸爸「辯論」。
「入娛圈初期，爸爸差不多有半年無同我講嘢，我其實明白佢心情，佢覺得栽培咗個女咁耐，可能佢都想退休，想將自身經驗傳授畀我，但我偏偏選擇喺實習一年後，做咗一份完全跨界別嘅職業，所以當刻佢可能都會失落，我知道佢唔開心。」沈殷怡說。
爸爸冇嗌「Objection」，只因:「爸爸係一個好理性嘅人，佢覺得同我溝通無作用，我已經做咗呢個決定。」雄辯滔滔大狀，說不過的是女兒的倔強。「我細佬依家都讀緊法律。」，父親交棒心願，應該不會再落空。
「我亦有同佢講，希望用兩時間可以證明畀佢睇，我呢個選擇嘅成長。」由初入ViuTV主持學術性節目，到拍住金剛的《金剛旅神團》、《辣火頭》，直到上月《美女郊遊遊》，剛剛好兩年，總算有點成績，但跟父母對她的期望，相信仍然好大距離。 事關沈大狀，一直打造女兒成為律師界淑女。但Shirley棄律師轉行演藝，還要「Big波蕩漾」，豪邁地行山。
「屋企人的確想培養我成為淑女，但慢慢走向麻甩，我都唔知點解，愧對佢哋嘅栽培。」說罷又笑一餐，相信無論女兒如何超出他們的期望，沈爸媽也尊重孩子的發展，從她的ig，經常看到與父母的溫馨家庭照。
淑女殼，麻甩底，看她用的開工袋用至又殘又舊，化妝袋就用佳能密實袋代替，就知她有跟男士一樣的不拘泥。
父母睇完《美女郊遊遊》有咩反應？「見到我努力工作，同埋事前知道節目內容，唔係只有性感三點式，大部分著得密實咁行山，所以佢哋嘅反應比我預期中冇咁大，反而有叫我小心，唔好做啲咁危險嘅動作，問我點解唔拒絕跳潭。」堅持，終令父母改觀。 講番沈父威水史，86年受聘為香港律政署橡察官，專責刑事案。不斷躍升，至16年榮休前任律政司副刑事檢控專員，除任內負責曾蔭權，同許仕仁案件，多年前賊王季炳雄街槍擊警員案，都是他擔任檢控，16年他獲頒銅紫荊星章。
Shirley在節目表演奔放，但其實自幼家教嚴厲，溫室長大，好難想像大學前，Shirley未唱過K。
「中學時期，放學後最遲七、八點一定要返到屋企，唔可以超過呢個時間，而且每日都要報備幾次，屋企有晒家規同頗多規律，例如唔可以去唱K，因為屋企人覺得唱K好危險，整個中學年代未試過自己同朋友行街嘅生活，我就係咁樣長大。
直至出國讀大學，先發覺原來世界咁大，有知道可以有咁多事情可以做，先至發現原來可以咁樣玩，或同朋友聚會，我可以過呢種生活。」 飛出管轄範圍的日子，「我冇因為咁變得放縱，事關身邊同學個個都好搏命讀書，晨早六，七點已經喺溫書，個個好自律，呢種環境你根本唔敢怠慢學習。
至於媽咪，雖然唔喺我身邊，但每日都會打好多次電話俾我，佢會清楚我嘅行踪。雖然可以唱K，但都要影相俾佢睇，再影埋個環境俾佢睇。佢好厲害，識昨我所有朋友，有晒聯絡資料，甚至有時比我更快知道朋友最新動態。
就係覺得一直太過被寵，導致好多事情，都覺得應付唔到。所以點解我會選擇出國讀書，無留低喺香港？其實某程度都係因為自己想外闖一下，或者試吓喺無屋企人監管下，我會變成點樣呢？畢業返港後，我覺得佢哋其實都接受到個女，變得唔係太斯文，仲有啲癲喪、古靈精怪嘅一面。」 問她為何不選擇英國或美國，而揀上海復旦大學讀法律，她說:「家庭成員已經有英國律師牌照，但無中國律師牌照，所以有少少類似派我去完成呢個登月夢想一樣，我就為咗成功考獲內地牌照呢個任務而出征。」目標明確。 不過花了多年時間，辛辛苦苦讀到法律碩士才轉軚，自己不感可惜？
「中學時參加舞台劇，大學時亦有參加唱歌比賽，其實自小對表演都有興趣，但覺得每個人應該要有一項專業技能，先可以更穩定去追求自己想做嘅事。我知道表演唔係一個穩定行業，仲要好靠運氣，而且自小都唔係一個會跳出comfort zone嘅人，所以當時覺得應該先修畢法律呢個專業，將來真係有咩問題，天時地利人和都缺乏嘅時候，我至少可以繼續法律工作，至少有一個專業。所以會同自己講，一定要完成律師考試同碩士學位，先考慮係咪加入演藝界。」棄專業追夢，但又為夢想舖定後路。
在內地一邊讀法律，一邊做model，不是急發明星夢，是鬥氣。
「模特兒工作只係做咗好短時間，當時我係用獎學金去外國讀書，亦曾經膽粗粗講，出國之後就會學識獨立，唔需要屋企人畀生活費，反正有獎學金，會自己賺錢，做一個獨立女性，將所有事情都諗得好理想。但點知最後發現，生活開支唔係所想咁少，或者世界唔係我諗得咁簡單，於是先兼職模特兒工作，其實目的係想賺取生活費。本身我性格好倔強，又唔想認低威問屋企人攞錢。」
不靠父幹，這位千金小姐在ViuTV捱了兩年，攀山涉水，終於出頭。
採訪:Sukey
攝錄:LL Production House
服裝:b+ab ----------------------------
APP 內 1-Click 訂閱
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|