伍詠薇的傳奇，在於她的第一段婚姻，20歲選美入行，21歲便「封盤」，嫁給51歲的香港安永會計師事務所高級合夥人翁江培。
當外間都認定她是「幸運灰姑娘」，翁江培結婚13日卻因心臟病發猝逝。伍姑娘由靚太變成寡婦，這個打擊很大，她更被揶揄「剋夫」，甚不公平。
伍姑娘1989年參選亞姐入行，很多人都以為她因為貪慕虛榮才去選美，「當年我去選美，其實係翁生鼓勵我。」伍姑娘話當年：「我第一份工做marketing，去event識咗好多媒體，亞視有人叫我周六入亞視同佢哋拍條片宣傳亞姐，我以為拍片有錢，點知導演見到我叫我不如參選，再入到經理房，佢哋就介紹我識咗第一任丈夫（翁江培）。之後我哋好正常咁去約會，佢叫我去選美，佢話參選冇蝕底，仲話如我之後識到男朋友好過佢，後生過佢都可以離開，佢目的係想掟我入大染缸，考驗我會唔會學壞，同時測試吓我對佢嘅愛，就係咁我咪去選囉！我當時心態係我好愛呢個男人，佢想我去做、想去學呢件事，我咪去做，去prove我對佢嘅愛。選美嘅過程，好多是非，我本身非群體生活，我只想快啲選完同佢拍拖，做番個普通人。」伍姑娘選美台上表現不錯，也是頂頭大熱，無奈最後三甲不入，冠亞季分別是翁虹、萬綺雯和趙靜儀，伍姑娘說：「我唔係好靚 ，冇想過會入三甲，當晚三甲都實至名歸，選美好講臨場表現狀態。」
伍姑娘選美後閃嫁翁江培，兩人年齡相差30年，最初帶男友回家都心驚驚，「我冇同家人講佢幾多歲，佢個樣似40幾歲，我介紹男友畀媽咪同哥哥識時，佢哋都嚇一跳，點解你識個男朋友咁大年紀，好彩佢哋傾到偈，仲好舒服。當年爸爸已唔喺度，佢哋都接受翁生，佢同我家人講係認真『唔係玩你個女』。」伍姑娘形容跟翁江培亦師亦友，「佢教我好多嘢，佢出咗一張信用卡畀我，教我點去慳錢同使錢，一個咁有錢男人，唔係媾個女仔返嚟畀錢佢使，佢唔只想我做公主皇后，佢教曉我將來點做一個好太太，點用一張信用卡，點做一個好女人，我真係終生受用，雖然我平日講嘢好mean，但我入面嘅個人修養，多謝翁生教我。翁生畀咗好多養份同知識我，所以呢段婚姻，我得來不易，我都無悔，我幸運一生人有兩段咁好嘅婚姻，有兩個咁好嘅男人疼愛我，短暫浪漫就係咁。」
翁江培長存伍姑娘心中，「我不時都會諗起佢，佢種咗喺我心中，係真㗎，教我好多嘢，我仲記得，佢嘅好，我全部都記得，佢係一個對我好好嘅男人，佢係我人生教科書，教我做一個女人，你聽過一個老公教你做一個女人未？佢不得了。」不過翁江培猝逝，也對伍姑娘的演藝事帶來負面影響，「嗰刻我同自己講，要繼續做呢行，必須企番起身，呢一撠，好多人話我係『劏豬凳』，話我貪錢，事業係撠倒，冇發生呢件事，我做呢行可能順啲，但係呢啲嘢冇得嬲，我係比人跑慢咗，但我唔會complain！」
撰文：比華利
攝錄：廖達燊、陳慧安
髮型：Debby Kwan @ HAiR
場地：源品雞煲
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
