張敬軒成為武漢肺炎疫情爆發以來，首位再在紅館舉行個唱的歌手，大會表示今晚只安排6,000名觀眾入場睇騷。雖然疫情近日似轉趨嚴重，但仍「全院滿座」，到場捧場的嘉賓有楊受成夫婦、彭秀慧、吳浩康、艾妮、蔡卓妍（Sa）、周家怡、泳兒、關智斌、霍啟剛夫婦、曾樂彤、洪卓立、楊政龍等。
而為軒仔伴奏及演奏的樂隊成員及中樂團合共約80位成員，全部戴上口罩，但沒有透明膠板阻隔，而且中樂團成員的座位之間的罅隙很小，坐得頗「親近」。
演唱會開場前，螢幕播出由軒仔化身紅館職員拍攝的防疫短片，片中戴上口罩、着上制服的軒仔走上觀眾席中作示範，過程不失搞笑。例如當女旁白提醒大家要坐在自己的坐位，指若然見到旁邊空出來的坐位：「其實係留畀你哋見唔到嘅……空氣，保持一定社交距離，總之唔可以擅自調位。」又提到整個騷都需要戴上口罩，不能進食及未經授權不能拍攝等。
之後，軒仔又走出紅館外圍，指已收到大家的心意，不用花錢送花給他，因為不值得，而當旁白講完「唔值得」後，軒仔更作狀用腳尖捽了幾次地，又呼籲fans不要見他平日「冇啖好食」而送上食物，皆因紅館的前、後台均嚴禁飲食，餵他的重任就留返畀家裏的「遮遮」。而為了控制人群，亦呼籲完場後不要在後台等他，皆因他完騷後要即時返家「淨身」，但旁白講完後即改為「消毒」。而他之後走到廁所，表示若然去完洗手間就要洗手5次，而洗手其間最好唱住「成碟青瓜過大海」。觀眾看畢都有捧場笑一笑。
軒仔於晚上8時32分穿上一襲釘上珍珠粒加碎石的拖地長外套現身，唱完《酷愛》，全場鼓掌，軒仔說：「紅館，我返嚟喇！大家都返嚟喇！多謝大家！」接着他見到只有一半滿的觀眾席，他說：「比着以往呢，喺台下升到上嚟到今晚咁嘅入座率，我會好唔開心，但係喺咁嘅時候見到今晚有咁多朋友嚟支持我，十分感激！因為要配合返紅館喺疫情期間嘅座位限制，所以大家都見到坐得好疏落，都好鬆動，好少可見到隔籬有位擺嘢，不過冇乜所謂，只要你哋肯嚟就得㗎喇，你哋肯嚟，我就一定肯唱，幾多場我都唱！」語畢又獲全場歌迷報以熱烈的掌聲和歡呼聲。
軒仔續說：「呢個show容我哋籌備期間，一路我哋公司內部都話呢個show係『得來不易』，尤其係我自己本身對製作同演出都好有要求，所以我哋一路諗點樣有辦法，喺有限嘅條件入面，點樣將我哋嘅創意發揮到最大限度，所以今晚喺呢度嘅舞台佈置，或者唔可能好似以往咁樣同大家有握手嘅機會呢，希望大家多多包涵。反而用另一個角度睇，可能大家可以專心啲，去欣賞我同一班好偉大又十分出色嘅音樂家帶畀大家睇嘅音樂會，因為你哋好重要。」他又感謝紅館職員為大家清潔場地，更借觀眾的掌聲向大家致謝。軒仔講笑指，原本想訂購假手來代替握手位，而且亦欠缺以往一定有預備的場刊。
軒仔在第二章演出時換上白色古裝女造型獻唱《無忘花》，有4個舞蹈員在台上伴舞，4人有戴口罩。軒仔表示：「原本版本係有超過20位dancers，但因為實際條件下影響，唔想有咁多dancers交換飛沫，又知道佢哋戴口罩會好辛苦，所以由超過20個變成4個dancers。至於中樂手入面會有人負責吹奏，所以佢哋冇戴口罩，不過佢哋做咗深喉測試。」
軒仔其後換上白色閃片西裝唱《悔過詩》，其間他走近觀眾席揮手：「山頂嘅朋友你哋好！好耐冇講呢句喇！」顯得很興奮，然後他說：「好感恩，自從早餐單嘢，我多咗90後嘅歌迷，不過唔知係咪早餐迷。」有男觀眾大叫：「請唔請廚師呀？」軒仔笑着答：「炒兩個小炒嚟試吓先其實有冇人因為個早餐而入場？」現場有人舉手，軒仔笑話：「下次叫姐姐請大家食。」
由於要保持社交距離，軒仔無法與觀眾握手，他口沒遮欄地笑言為咗讓大家「瞻仰吓」，他特地拿出一把拉尺，拉好安全距離，然後繞場一周。有觀眾不顧一切湧上前面，企圖近距離接觸偶像，但就保持適當距離，全程沒有握手。
軒仔唱完《桃色冒險》之後提到，自己因為爆發疫情等問題，無法返廣州探望父母，而在過去的接近一年時間，家中失去3位家庭成員，其中包括他養的愛伏，不幸患上狗版的漸凍症，軒仔坦言看着牠的活動能力逐漸下降，直至不能進食，他形容自己渡過了一段好煎熬的時間，但他認為生活中有苦事是正常的，也一定有不順利的事，所以當自己好和開心的時候，就要好好珍惜；而當自己無的時後，就要識得在細微地方尋找開心，那才是自己在世上的存在價值。軒仔又爆每日起身都會收到老闆楊生發出的長輩圖，他指那是因為對方關心自己、想起自己，所以自己也會珍惜，並繼續為身邊的人和觀眾帶來快樂。
他唱完《故園花茶》之後，向觀眾致謝：「衷心多謝大家，我都知道售票、換票有好多波折，要大家撲嚟紅館，我哋怕有任何甩漏，所以全部用人手處理，多謝大家支持我。」在他《笑忘書》前，軒仔再說：「呢首歌有千斤重嘅感覺，相信大家入嚟嘅心情同我心情一樣，係彷如隔世，本來睇演唱會係好理所當然嘅事，都變得咁艱難，無論嚟自咩崗位，邊度嘅觀眾，無論生活有幾苦，有張敬軒音樂陪住大家係我嘅福氣。」之後觀眾開手機燈配合，一片燈海陪着軒仔演出。其後，軒仔唱《騷靈情歌》時，又走近觀眾席，觀眾湧到台前，軒仔最後勸他們要返回座位。
而軒仔在演唱會中除了祝福今日38歲生日的阿Sa生日快樂外，又宣佈好消息：「唔係結婚，唔使驚！係我入公司不經不覺都有7年，公司上上下下都好支持我，今年我正式成立自己嘅唱片品牌，希望大家支持呢個新label發行嘅唱片。」軒仔最後唱完《櫻花樹下》後，向觀眾講「拜拜、注意安全。」然後分別向四面觀眾單跪鞠躬，演唱會於晚上11時05分散場。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|