比起大台的人力財力，ViuTV的真人騷《全民造星》系列，絕對是近年低成本高效益的上佳之作。今年來到第三屆，話題依然源源不絕。正當焦點落在10強人選時，身為元祖級的姜濤，在這兩年默默耕耘下，無論在歌、視領域已邁向「造星」之路，去年商台頒獎禮還是拿生力軍銅奬，今年已成功殺入我最喜愛男歌手5強，速度之快如坐火箭。不過賽果未揭曉，姜濤早已心裏有數。日前他接受《蘋果》訪問時坦言：「入到5強都係fans投我一票，會珍惜但唔會因為咁沖昏頭腦，事實係打定輸數，因為自己資歷唔係咁勁，咪以為入到5強就有5強嘅實力，不過呢個係一個好好機會，等大家認識有個叫姜濤嘅人，可以聽吓佢啲歌！」
行內人有句說話「你的樣子如何，你的星途也必如何！」今年只得21歲的姜濤，後生加靚仔，唱得又跳得，莫講話𡃁妹鍾意，連年紀有返咁上下的姨姨，都湊熱鬧齊齊去追星，這個墟冚境況似曾相識，在90年代四大天王全盛時期見過，數數手指，原來已是30年前的事。可是，要做偶像，無可避免會有偶像包袱，無論外形或行為，時刻要保持形象，拍拖更加唔使諗。自認單身的姜濤，一講拍拖即大呻：「我呢個年紀嘅男仔，都會恨拍拖，邊個唔想？好正常嘅一件事，但如果要做呢行，就要考慮好多嘢，我會諗好耐係咪真係啱呢？係咪真係有必要呢？鍾意得咁交關要非追不可？始終而家事業係我最鍾意嘅嘢，我會諗，會唔會為咗呢個人放棄呢？」咁多顧慮，難怪姜濤感情生活仍處A0（未拍過拖但隨時ready）狀態。
身為家中獨仔，姜濤從未帶女仔返屋企，早前他到台灣拍偶像劇《超感應學園》及錄新歌《愛情簽證申請》MV，成世仔第一次離家4個月，家中媽媽叮囑他咪餓親之餘，更落order叫他的起心肝搵個台灣女朋友。姜濤自認沒有幻想女友對象的框架，反而有位圈中女神令他着迷，正當大家估緊近排邊位女神hit，點估到姜濤衝口而出的，竟然是80年代性感女神「紅姑」鍾楚紅。「係呀，好鍾意佢！」記者不信，問他看過紅姑哪套電影，他秒答：「《秋天的童話》，我睇過好多次啦，因為阿媽好鍾意佢，細細個就畀我睇，佢其他戲我都有睇，佢真係好吸引。」
講起姜媽，姜濤早前被MIRROR隊員篤爆是最姿整隊員，遇見任何反光物件都不會放過。姜濤笑指這個習慣，或多或少遺傳自媽媽。他尷尷尬尬地說：「嘿嘿，呢個習慣可能係阿媽教，佢由細到大都有潔癖，所以我都有少少強迫症，或者係安全感問題，其實都知頭髮明明冇乜嘢，但我就係想掂一掂，點知越掂越衰，做歌都係咁，其實明明嗰件事唔係咁重要，但我就係要堅持。」對於被隊員指好勝心強，姜濤直認不諱，更指自己沉迷所有有競爭性的比賽，亦因此對自己的要求很高。「我哋屋企唔係話好有錢，阿媽有啲乜好嘅嘢都會畀我，食好住好，所以食到我咁肥。由細到大，阿媽對我期望好高，講嘅唔係讀書方面，佢只係對我個人有好高嘅期望，可能唔想令人失望，令我有唔服輸嘅性格。同樣如果自己做唔到人哋嘅期望，自卑感又會出返嚟。」
Fans愛錫偶像天經地義，各自擁戴偶像亦理所當然，可是，有比較就容易有傷害，姜濤由當初參選《造星》時，已被網民指他深得節目監製花姐愛戴，更謔稱他是契仔，誰知兩年過後，「契仔」人選早已物換星移，現時網民改指花姐偏愛Ian、Anson Lo，還有今屆《造星III》的新力軍Timo和ANSONBEAN，更將4人依次序改花名為契仔、契女、契毛和契豆。至於姜濤，反被網民同情所得資源及不上其他人。對於網民的肉緊，姜濤自言收到晒，明白fans對自己緊張，但他認為成員之間有比較其實是好事。「最重要係你用咩心態去比較，好似我哋團入面，Anson Lo跳舞好勁，當然我都想同佢比較跳舞，希望變得好似佢咁勁，咁呢個咪係良性競爭囉！」對於fans之間的磨擦，或是被hater攻擊，姜濤慶幸MIRROR 12位成員可以做到一條心，但亦承認為此會經常調節心態，聽取別人意見之餘，亦要時刻保持自我。「其實我不嬲當人工包埋，攞呢份錢就預咗有呢啲嘢發生，我阿爸話做得廚師就預咗焫（音辣）親手，冇辦法冇得埋怨，當然每個人睇到呢啲嘢都會唔開心，有人話你樣衰，咁應該冇人真係覺得自己樣衰嘛，惟有聽完就算，但我都會聽邊啲批評得有道理，因為你完全唔聽又唔得，咁唔知外界對你嘅評價係乜嘢，所以要去分囉！」
做藝人除了要有聲色藝，對人對事做到面面俱圓亦是份內事。相對而然，性格內斂的姜濤，由當初參選到入行這兩年，經歷不少人和事後，至今只有一個人值得他百分百信賴。「呢個人肯定係花姐，無論外界點樣講花姐呢個人都好，我入行第一日已經將自己所有嘢同佢講晒，甚至有啲我阿媽都唔知，哈哈，對唔住呀阿媽，有好多人話喺呢行裏面冇人值得信任，唯獨花姐，係佢帶我哋入行，我知就算激親佢，佢唔會真嬲，無論佢當唔當我哋係仔，我哋MIRROR都會當咗佢係喺呢行嘅阿媽。」
撰文︰王梓嫚
攝影︰沈健程
攝錄︰馮嘉銘
場地：FWD HOUSE 1881
服裝: Y’s
髮型：Lydia Yung &Denny Ku@ Chic Private I Salon
化妝：Circle Chong &Tifa @Annie G Chan makeup centre
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|