掃呢頁CODE去手機

2018年12月16日 星期日

【大台肥仔配角打三份工儲錢買樓】「龍貓」 何遠東:我咁肥,無錢開飯係好大鑊(足本版) __,TVB,何遠東,大台,

演藝畢業後,何遠東便被無綫睇中,簽部頭約拍劇,因為小時候家庭環境不太好,為了賺錢,試過打三份工,想盡快儲錢「上車」,佢話:「當時我覺得都唔只打三份工, ...




演藝畢業後,何遠東便被無綫睇中,簽部頭約拍劇,因為小時候家庭環境不太好,為了賺錢,試過打三份工,想盡快儲錢「上車」,佢話:「當時我覺得都唔只打三份工,我記得當時有到中小學做巡迴演出,喺學校教書、做舞台劇,仲有最好玩係有去配音,替卡通片、電影配音,所有肥仔角色你都會有可能聽到我把聲。當時好努力儲錢,因為啱啱出嚟做嘢,想多個錢傍身,同埋爸爸由細到大都灌輸我要積殼防飢,尤其是我咁肥,如果無錢係好大鑊,無錢開飯,變咗好想好努力咁搵多啲錢,同埋自己最主要係想爸爸媽媽放心我做呢一行,因為佢哋一直都好擔心。」

辛苦打幾份工,幾年前終於買到樓,肥仔東話自己完成了人生其中一個夢想:「其實買呢層樓係我小時候夢想,因為住緊嘅地方就係以前小學母校附近,細個睇住個地盤開始起樓,當然已經諗,如果將來買咗呢度返學就會好近,同埋因為地點好近爸爸媽媽,所以當儲到錢嘅時候,就選擇咗買呢層樓,其實好方便,因為可以慳好多錢,原因係我行番屋企食飯只需要五分鐘,起碼有湯飲,又有飯食,起碼打風落雨唔記得閂窗都可以有人幫手,唔記得帶鎖匙都可以叫阿媽攞過嚟。同埋都只係好好彩,當時只係搏一搏,因為當年樓價無而家咁瘋狂,所以先好好彩咁上到車,當然成功都需要父幹,我爸爸媽媽都有支持我少部分金錢。」

肥仔東回想起當年演藝畢業後,唔敢亂使錢,衫褲都係買旺角跳樓貨:「畢業初期真係唔夠膽亂花錢,好多衫褲鞋襪,我記得當時最鍾意就係落旺角行一啲出入口店,即係嗰啲跳樓貨,搵一啲衫著,因為真係好平,同埋我嘅尺碼當年都相當難買,因為比較肥。但我覺得好開心喎,又無睇唔起自己,我覺得呢個係階段嚟嘅。食飯當然又唔會揀啲咁貴嘅嘢,如果返到屋企就梗係黐屋企啦,因為爸爸以前係廚師,佢當然會照顧到我起居飲食。買嘢方面,莫講話iPhone,以前點會諗到可以買,只會買上一個型號,買啲平機用,跌花咗都無咁心痛。」

衫褲唔捨得買貴嘢,連食都唔敢食好啲。「我仲好記得當年食提子麥包,好大件嗰啲枕頭包,諗住慳錢,想達到目標就會不擇手段,唔俾自己食咁多,唔好買咁多嘢。諗番轉頭,呢個刻苦過程,我覺得係人生嘅一個好好經歷。」何遠東說。

喺無綫捱咗10年,而家算係有啲成績,肥仔東最想報答嘅,係為咗成就自己嘅父母。「直至而家,當然財政方面係穩健嘅,我嘅信貸評級係良好嘅,而家大部分錢都會交俾爸爸媽媽,因為佢哋係最好嘅儲錢機器,唔會亂花錢,同埋佢哋一定會為個仔將來而好慳家,而家成日都好想報答佢哋,例如帶佢哋去旅行係最實際,人大咗,爸爸媽媽年紀都大咗,我好想同佢哋去多啲旅行,因為佢哋以前唔會花錢去進行甚麼娛樂,所以而家如果有演唱會啱佢哋睇,佢哋有時間想去旅行,我都會全包宴咁樣,希望佢哋開心玩吓。」

立即下載Apps,隨時隨地睇盡時政專題、深度偵查、娛樂熱話!

按此連結:http://bit.ly/next28app

鍾意就快D Share啦!