掃呢頁CODE去手機

2016年3月17日 星期四

90後潮賣中國茶 阿媽幫拖 [壹週刊 - 1358 - 財經] M1,

全憑一杯茶,將Catherine(左)與媽媽Lily(右)原本疏遠的感情重新連繫。今次開鋪媽媽對Catherine行一條新的路亦很支持。壹盤生意90後潮賣中國茶 阿媽幫拖家長與兒女的溝通,不在乎時間多少,而在於質素。九十後容德如(Catherine)記得小時候,每晚都見不到母親一眼,「只能把手冊放在枱面,第二朝起身就見到簽好咗。」要見面,反而在雲南山上。容媽媽經營中國茶業批發,每年都要到雲南採購, ...


全憑一杯茶,將 Catherine(左)與媽媽 Lily(右)原本疏遠的感情重新連繫。今次開鋪媽媽對 Catherine行一條新的路亦很支持。

壹盤生意

90後潮賣中國茶 阿媽幫拖

家長與兒女的溝通,不在乎時間多少,而在於質素。

九十後容德如( Catherine)記得小時候,每晚都見不到母親一眼,「只能把手冊放在枱面,第二朝起身就見到簽好咗。」要見面,反而在雲南山上。

容媽媽經營中國茶業批發,每年都要到雲南採購,她會帶着 Catherine一起前往。這兩個星期相處聊天,幾乎多過兩人一年內說話的總和。在母親的薰陶下, Catherine亦因此愛上中國茶,兩年前創立自己的品牌瑜茶舍,透過媽媽在馬會的人脈,她能在馬會專櫃零售茶葉。

半年前在火炭開茶室,猶如中式 café,一杯中國茶、配上芝士及雪糕等小食,吸引年輕人。對於女兒嘗試,傳統的容媽媽雖然未能全部認同,但也不會給予意見,「我有我想法,但怕講咗唔合佢心意,佢會覺得有壓力。」

這句說話,如呷一口茶,嗒落有味。

茶室以年輕客人為主,但經傳媒報導後,有些上年紀的客人帶着報紙來,把整罐六千多元的茶葉買回家。

記者於兩個星期前,第一次前往茶室訪問, Catherine表示我們不能訪問媽媽,因為兩人正在「鬧交」,為的是在所有媽媽眼中、比經營一盤生意更大的事,她哽咽道:「佢話我三百六十五日都唔喺屋企食飯,無時間陪佢。」她回憶說:「我細個佢要應酬時,我都成日問佢,『你喺邊度呀?同邊個一齊呀?幾時返屋企?』」母女其實像一對情人,都是互氹,「惟有當佢係小朋友。」到上週記者再去,兩人已經言歸於好,容媽媽自信地反問記者:「我哋好 close㗎,你同你媽媽有無咁 close?」記者見 Catherine的手機 wallpaper,都是母女兩人的 selfie。

容媽媽在 Catherine小時候已和前夫離婚,一個人湊女、又要賺錢,擔子十分大,都看在 Catherine眼裡,故即使平日母親無時間陪伴,她都不會怪責。每年最期待就是放長假時,可跟母親到雲南出差,「通常會留兩個禮拜,好珍惜嗰段時間,主要行不同茶山,話題都圍繞茶,閒時會一齊上網查找茶的知識,時間好快過。」這令 Catherine由細個開始,已對中國茶產生濃厚的興趣及累積了一定的認識。她在英國中央聖馬丁藝術與設計學院畢業後,已決定回港投身中國茶生意。

坦言靠阿媽

容媽媽初到雲南前知道紫外線強,醫療設備不足,故帶了些防曬太陽油與必理痛,以備不時之需,亦當作手信送給茶農,「佢哋好開心,有一次我發現食水的水源不潔,有地方甚至沒有食水到,所以花了一筆錢做扶貧,逐漸建立感情。有一次 Catherine發高燒,佢哋喺酒店大堂等我哋幾個鐘,又不停想各種方法退燒。因為同茶農做咗好朋友,所以並非普通買賣關係,是以合作社形式運作。」容媽媽退休, Catherine順利接手,不過當中發生過一次小插曲。事源上年因雨量過多,茶的質素相對差,茶農先斬後奏將茶葉送出後,才致電 Catherine指有幾萬元茶已經在運送途中,為保持雙方關係惟有「硬食」。為了增加茶的種類,除了去雲南買普洱,她也隻身跑到台灣茶庄,「佢哋見我咁細個,以為我買手信玩吓,見到我識睇湯色、茶渣的質地,先有心同我傾,最尾選咗木柵鐵觀音,同金山烏龍茶。」

採購好茶,最初把茶葉重新包裝,在馬會寄賣,她不諱言媽媽是馬會茶顧問,靠的又是媽媽的關係。但也有靠自己,「我以前性格男仔頭,喜歡睇漫畫、彈結他、自由搏擊。」但因要出席商會飯局,認識有消費力的老闆、合作夥伴,開始扮靚,「靚都係一個優勢,因為商界大多是男性。你唔知機會幾時到,所以要 show-up,好似去五金商會,有一個老闆欣賞我的茶,向我買幾萬蚊茶。」亦有老闆選用瑜茶舍作禮品包。積極的她連到餐廳用膳,都會送出茶辦,雖然機會渺茫,但嘗試千百次總會有成功機會,米芝蓮食府「廚魔」就是這樣認識,每兩星期向她購買約十斤茶葉。

芝士和煙肉雖然是西式食物,但配中國茶亦毫無違和感。

陳皮普洱以五年的熟普洱,放入柑皮風乾,沖泡時以茶葉為主,陳皮為副,味道甘醇中帶點陳皮果香。

將茶葉飛甩老土

半年前於火炭設立瑜茶舍門市,只有二十多歲的她,坦言全靠媽媽資助,故一切都「慳住使」,瑜茶舍選址火炭一幢舊工廈,要穿過破舊的走廊,才能進入茶室,「選擇工廈因為租平,作為起步點唔錯,除水電以外,牆壁髹漆、購買家具並裝嵌,全都一手一腳落手做。」為顧着媽媽荷包,買個洗手盆 Catherine都比較過三十多間公司,最終以三百元成交,整筆裝修以超低價八萬元完成。這裡就如中式 café, walk-in客 order一壺茶葉,視乎品種,由六十八至一百二十元不等,可以無限加水,坐多久都可以,要配上合襯的茶點另加大概四十元, Catherine坦言比起賣咖啡毛利更高。

Catherine運用其年輕,了解潮流的優勢,把生意打入年輕人的世界,「近年流行文青路線,好多人上嚟影相打卡,因為鄰近中大,所以有一批中大師生經常捧場。」另外作為樓上鋪,需要有綽頭招徠。 Catherine從媽媽身上承傳了各種茶的知識,對茶的特色瞭如指掌,認為飲茶亦不一定配蝦餃、燒賣,芝士、煙肉等亦能與茶相配。上星期六工程師學會包場,一行十八人學一次 tea pairing,「我哋先試普洱,通常品茶分三口飲,感受不同溫度的味道。飲完可以拎一件芝士食,因為黑茶普洱去油,所以配油分高的芝士。另外紅茶滇紅味澀,可以配甜的雪糕;白茶白牡丹清香,可以配藍莓乾;綠茶龍井蔬果味明顯,可以配乾秋葵;青茶大紅袍以炭焙,可以配煙肉。」收費每人三百元,既能賺錢又能宣傳,很多客人之後會再買散裝茶葉離去。

上週六工程師學會包場學 tea pairing,一班年輕人對茶看來並不熟悉,在 Catherine講解時不時發問。

由於鄰近中大,不時有中大師生光顧, Catherine笑稱這裡變成中大人的聚腳點。

與大企業合作

一個廿五歲的女孩,能夠毫無怯場於商會中游走, Catherine指全因媽媽小時候間中會帶她一同應酬,「那些經驗幫我好多,嗰時開始習慣同大過我嘅人相處,中一嗰時我都係同中六生玩。」去年十二月透過商會的朋友穿針引線,介紹她為騰訊擔任茶顧問,「第一次去睇真係嚇一跳!為讓高層感覺備受尊重,騰訊有員工服侍管理層,但員工對沖茶完全無概念,竟然係用咖啡壺沖茶,外行人都知道有問題啦。玻璃比用茶壺散熱速度快好多,焗唔出味。」 Catherine收約七萬元顧問費,教授茶的基本知識,以及六大茶類的沖法,「例如黑茶普洱重發酵,需要用沸水;綠茶水溫可以低啲,但泡的時間長啲。泡茶要視乎茶壺的大小、茶葉的分量、水的溫度、泡的時間,要慢慢掌握,所以一個月先會上一堂。」為了令高層們養生有道,她亦教員工泡的茶應該隨季節轉變,春天鳥語花香飲花茶;夏天飲綠茶清熱降火;秋天飲烏龍茶暖身;冬天飲紅茶驅寒。

目前 Catherine忙於與不同品牌洽談 crossover,希望建立知名度,曾接觸 Log-On、誠品、 Page-One這類主打生活品味的品牌,希望對方讓她擺檔,加強她的零售網絡。生意上軌道, Catherine心中最大的憂慮是:「我唔係擔心瑜茶舍,而係我太忙無時間同佢相處,媽媽會唔開心。以前我喺屋企等媽媽,依家佢等番我。佢都會扭計,惟有多啲報告行蹤,又影相俾佢睇。」

Catherine自中學起不時陪媽媽上茶山,每個製作茶葉的步驟都嘗試過,以便更了解不同茶的特性。

有沒有想過大紅袍雪糕? Catherine更進一步,以大紅袍溝雪糕。一匙茶、一匙雪糕,味道與奶茶有點相似。

今年新開鑼的馬季首天, Catherine準備了茶餅在馬會售賣,不過一般人不懂處理茶餅,因此銷情欠佳。

開業成本( 10/15)

租金( 2按 1上) $30,000

裝修 $80,000

入貨 $10,000

總投資 $120,000

每月收支( 02/16)

營業額 $150,000

人工 $20,000( Catherine、一位長工)

租金 $10,000

入貨 $55,000

雜費 $3,000

盈利 $62,000

撰文:孫樂祈

攝影:鄭樹清

攝錄:廖健昌

ed_bn@nextdigital.com.hk


鍾意就快D Share啦!