掃呢頁CODE去手機

2016年3月17日 星期四

演唱會斬 4場 回春林憶蓮拖恭碩良放狗 [壹週刊 - 1358] 憶蓮,恭碩良,M1,林憶蓮

林憶蓮與恭碩良孖咇放狗,玩足兩個鐘。探熱針演唱會斬4場 回春林憶蓮拖恭碩良放狗上世代天后排住隊開騷,計傻女陳慧嫻後,一世宿敵的林憶蓮接力,3月25日開鑼唱紅館。據知,林憶蓮原本堅持開到八場先答應開騷,但主辦商計過數,八場如果去唔到飛肯定蝕出血,啃唔落,焗斬四場。開騷迎接半百(26/4生日)的林憶蓮,早前孖住男友到數碼港放狗,素顏的她就算近睇皮膚都細滑緊緻,有細11年的恭碩良滋潤,林憶蓮唔使打乜整乜 ...


林憶蓮與恭碩良孖咇放狗,玩足兩個鐘。

探熱針

演唱會斬 4場 回春林憶蓮拖恭碩良放狗

上世代天后排住隊開騷,計傻女陳慧嫻後,一世宿敵的林憶蓮接力, 3月 25日開鑼唱紅館。

據知,林憶蓮原本堅持開到八場先答應開騷,但主辦商計過數,八場如果去唔到飛肯定蝕出血,啃唔落,焗斬四場。

開騷迎接半百( 26/4生日)的林憶蓮,早前孖住男友到數碼港放狗,素顏的她就算近睇皮膚都細滑緊緻,有細 11年的恭碩良滋潤,林憶蓮唔使打乜整乜,自然回春。

心雄大想頭

林憶蓮經典金曲多,加上「林粉」都是捨得使錢的一群,所以每隔幾年便有主辦商拍門,游說她搞演唱會。去年底,憶蓮天價參加內地綜藝節目《中國之星》做「巨星推薦人」,之後內地工作量倍升,心雄的她,一度開出做到八場先唱的條件。

「 Sandy喺香港唔算好活躍,如果而家要開八場其實好難,但公司都照做,諗住佢做咗《中國之星》後人氣好咗,對去飛有幫助,只要配合吓宣傳,有可能頂到八場。」一名主辦單位工作人員說。

下月便滿 50歲的林憶蓮食咗防腐劑,同 16年前與張國榮於新城錄廣播劇的樣貌無大分別。

恭碩良挨住林憶蓮撒嬌,旁若無人。

蘋果當下午茶,開騷在即,林憶蓮食得小心!

斬宣傳斬場數

去年底林憶蓮為《中國之星》擔任推薦人,邀請許志安合作,有錢齊齊搵。

陳慧嫻開騷,電子、平面媒體訪問盡做,加場又加場都照爆。偏偏林憶蓮走風格路線,以同步錄廣東、國語碟為理由,大幅削走九成宣傳,只出過一次演唱會記者會和做一本月刊訪問,勢色唔對,主辦單位斬四場保本。

「其實到而家頭三場的飛都賣得麻麻,但開三場一定血本無歸,焗住開多場,再諗計散飛。」

得天獨厚

與別不同!月尾開騷的林憶蓮依然大得閒,同恭碩良拍拖放狗。早個禮拜,林憶蓮做司機,同恭碩良加埋外傭三人兩狗 Dizzy和 Oliver去數碼港放電。

落車自己行去草地先的林憶蓮,是日紮起髮髻,衞衣襯 vans,一身青春 look配合平日牛記笠記的恭碩良,冇化妝但皮膚白裡透紅,下月二十六日便滿五十歲的她,完全冇中女的鬆泡泡,得天獨厚。

林憶蓮同恭碩良同狗友吹水,又忙住同白色西摩玩。

林憶蓮同恭碩良同狗友吹水,又忙住同白色西摩玩。

陪愛犬跑圈,當練氣。

懷疑有記者,林憶蓮留低恭碩良與外傭,自行去攞車。

公然調情

一行人走到公園較少人的位置放狗,陪 Dizzy(唐狗)四圍跑,又撩 Oliver(唐狗混雪橇)玩,熱晒身後,林憶蓮開始放下戒心,走到正在傾電話的恭碩良前,一手拖住他,追住愛犬跑去跟其他狗狗一齊玩。狗有狗跑, Sandy同恭碩良則走埋一班狗友堆吹水,又同一隻白色西摩犬玩。

終於講完電話的恭碩良,要同愛犬拍照留念,亦不忘氹女友,講到手舞足蹈,三言兩語,已令林憶蓮笑到見牙唔見眼,他還不理狗友在旁,突然伏在女友的膊頭扮撒嬌。

放電到傍晚六時,林憶蓮警覺有記者,二話不說撇低男友,被丟低的恭碩良帶住外傭同兩隻狗繼續踱步,等女友揸車到場,馬上上車走人!

事隔四年再開騷,林憶蓮無時間做宣傳,至今中價飛仲有得賣。

陳慧嫻肯積極為演唱會做宣傳,結果加場再加場。

凍齡高手

圈中有唔少半百凍齡魔女,個個有如食咗防腐劑,但究竟真正冇添加、天然不老的有幾個?大家心照。

羅霖

雖然生咗三個仔,但仍然 keep住 34、 25、 34的誘人身段,憑凍齡外表及驕人身材,去年半百出寫真,大晒泳衣及 corset look,戰勝所有𡃁模。

鍾楚紅

56歲港姐出身的紅姑,雖然圓碌碌,但勝在識遮掩,著 deep V出席活動,身材噴血,加埋招牌笑容,過到骨。

關之琳

驚爆與陳泰銘秘婚兼離婚的關之琳,情傷卻毋損大美人氣質,更加冇現時女星的「膠樣」。

吳婉芳

48歲的吳婉芳是 86年港姐亞軍,與富二代胡家驊婚後誕下兩子一女,但吳婉芳是逆齡強手,係美魔女排行榜中嘅 No.1。

撰文、攝影、攝錄:娛樂組


鍾意就快D Share啦!