「依家當歌手，銷量達金唱片都唔容易。所以 08年《囍帖街》成功，我冇諗過會咁爆，達到銷量數字，唱片公司做咗呢隻金唱片俾我紀念，好感激當日嘅音樂團隊。」
娛樂偵訊
人字拖到六吋高踭鞋 謝安琪那十年
一個箍牙的新進歌手，一間在山林道起家的山寨唱片公司！謝安琪（ Kay） 05起跑到今日，十年間遇過力捧變生仔，走紅逢爆肺。捧過上天、也被圍插到谷底，再反彈成為當今高登女神。高低起跌，猶如其暫別作《山林道》所講，謝安琪的路，是開山劈樹，經歷高高低低。
山路跑得久，就想返回平地抖一抖。在四月暫別個唱前，回味十年點滴。
人字拖到六吋高踭鞋
「唱歌係我第一份工，當年我好內向，連照鏡都冇自信，出活動影大合照，永遠企最側，唔做焦點好舒服。入行頭幾年好掙扎，覺得唔啱做幕前。當時公司都好新，冇乜錢俾我置妝，好記得經理人個太太買咗兩本化妝書叫我跟住學，咁就出事嘞！唔識化妝，出活動唔畫眉、唔打粉底，只畫條眼線，亂掃眼影，所以睇番當年個樣，真係好嚇人。嗰時去海港城唱歌，夠膽死著人字拖去。之後當然知道低調做音樂係唔 work，所以逼自己突破，由怕醜到依家可以望鏡頭，係我最大改變。唔想浪費 styling心血，喺屋企著住高踭鞋練行路，逐吋加上去，結果愈戰愈勇。」
張繼聰陪住交代
○七年，環球睇中謝安琪簽約力捧，豈料意外懷孕，最擔心並非事業被煞停，而是如何向老闆交代。
「當年為生小朋友煞停事業，對我嚟講唔係一個好大包袱，可能我仲好新，最大壓力係向公司交代，因為我，影響公司好多計劃。當時我另一半仲同我一齊返公司搵老闆交代，向佢哋衷心道歉。環球嘅 Duncan，聽到之後竟然話冇問題，環球都有好多有家室嘅歌手，當堂鬆一口氣。」
最感動的禮物
「我係個長情嘅人，會 keep起歌迷送俾我嘅嘢。其中呢份對我嚟講好珍貴，係內地一位歌迷喺網上投俾我。《光明日報》，刊出日期係七七年三月十三日，即係我出生日期，下面寫住創刊日期係一九四九年六月十六日，呢個月、日係我個仔嘅生日，我收到都當堂毛管戙，佢呢份心意太珍貴。」
偶像的窩心偶像
十年唱歌生涯，令謝安琪喊的只有劉德華。
「我係佢歌迷，見到佢會好緊張！有年佢請我做佢個唱嘉賓，彩排時佢話上台大家傾幾句就唱歌。點知到正式，佢講咗一段好感動嘅說話；佢話女藝人永遠以最佳狀態見人，但見我未修晒身已經出番嚟唱歌，知我好努力，佢好開心見到歌迷好努力變成歌手，我真係感動到喊。個唱完咗一個月，佢曬番啲相送俾我，仲寫上：『生命中有你真好！』華仔係一個好窩心嘅偶像。」
冇瓊姐冇醒目嘅我
「我由籍籍無名，到簽大公司備受呵護，好受歡迎到變圍攻好幾年，真係好難捱。又唔知幾時開始，被網友稱呼做女神，起初我以為係咪惡作劇玩我。槍打出頭鳥，當日有人有心要做你，真係中得好應。我係奇葩，一槍槍咁打到穿晒窿，我應該化咗灰，但可能我硬頸，同身邊人支持，我唔俾自己死。我曾經抑鬱到一個程度係有自殺傾向，呢種精神折磨要毀一個人真係好容易。但捱過之後睇法又唔同，呢個都係成長，似一場血漬斑斑，打仗般真實嘅外展訓練。呢幾年，網上『瓊姐』嘅追擊，係帶俾我好多煩惱，但佢亦係我生命一個課題，冇佢今日嘅我可能冇咁醒目。」
撰文、攝影、攝錄：娛樂組
|
鍾意就快D Share啦！
|
|
|
