劉華負責的動作場面，一面倒被人揼，洪導好帶挈。
探熱針
父女檔拍住上 劉華女冧掂洪金寶
64歲的洪金寶打得亦導得！超過廿年再做導演，天王劉華都俾面，幫手喺新片《特攻爺爺》做串星；又幫手做監製搵埋卡士，向三毛（洪金寶）推薦在《風暴》中合作過嘅童星陳沛妍拍檔扮父女。十三歲陳沛妍除咗戲好，仲有本事氹到三毛同老婆高麗虹氹氹轉，一見到佢就心形眼。劉華呢粒哎吔女，好掂！
三毛鬧人都就住
被劉華欽點演出《特攻爺爺》的陳沛妍（ Jacquline）雖然得十三歲，但已有六年演出經驗，拍過唔少電影同大台劇。一三年 Jacquline在電影《風暴》飾演有嚴重自閉的姜皓文女兒，同在片中做她契爺的劉華亦有不少對手戲，父愛氾濫的劉華，對呢位小演員分外照顧。
「 Jacquline外形係普通咗啲，但演技就好唔錯，直頭係人見人讚嗰隻，加上佢唔會好似其他細路牙尖嘴利，所以劉華特別錫佢。」一名《風暴》幕後人員說。
天王一聲令下，陳沛妍馬上飛到黑龍江埋位。鏡頭外，劉華當她親生女一般照顧，對眼永遠追踪住之外，又經常噓寒問暖，「頭先午餐食咗乜嘢？夠唔夠飽呀？」、「凍喎，好著多件衫。」事事關心！
由於 Jacquline好戲又乖巧，連在片場躁爆的洪金寶，亦被氹到笑晒！只要她有份開工的日子，洪導就會特別好聲氣，就算要發炮鬧人，都會就住啲。
高麗虹做伙頭軍
繼九五年的《冇面俾》，六十四歲洪金寶再次自導自演，原本計劃是叫齊七小福埋位，但臨開拍前，房祖名在北京涉毒被捕，成龍奔走救子辭演，令原本只有十組戲多啲的劉華，戲份愈拍愈多。
「而家拍戲，有個有票房嘅演員幫手點都穩陣啲，華仔今次仲孭埋監製個位，佢當然想套戲收得，所以呢頭拍完《失孤》，嗰頭就撲去黑龍江埋位，之後再去埋俄羅斯拍外景，真係好幫手。」一名劇組人員說。
洪金寶嗌咪一呼百應，七小福的師弟妹外，契仔彭于晏、胡軍、麥嘉等個個落場客串；老婆高麗虹更充當伙頭大帥，為幕前幕後準備每日三餐，仲要照顧到各人需要，好似劉華係食素，洪金寶有三高要清淡，幕後體力勞動大，就要準備大量肉類諸如此類……連唔關事的梁家輝，千里迢迢走去黑龍江探班，都是為了食。
撰文、攝影、攝錄：娛樂組
|
鍾意就快D Share啦！
|
|
|
