探熱針
隊十支紅酒 Bosco搞掂 29AA日模
舊愛胡杏兒嫁人做李太，黃宗澤都唔執輸，衝出香港，同日本 model Jun行埋，同老模楊崢姊弟戀快來快去，今鋪愛上日模，在 Bosco小心保護下，二人已拍拖七個月。
去年 8月，因為合作拍廣告而認識， Bosco更第一時間出擊，邀請對方收工去劈酒，結果一撻即着！日前女友由日速遞到港，被撞破同 Bosco酒店宿一宵，戀情終於見光。
上圍僅得 29AA的 Jun，原來大有來頭，是日本高級時裝雜誌常用的「人肉衣架」，更是多個歐洲品牌的御用紅模。
高瘦平有齊
被踢爆同日籍女模 Jun酒店包房過夜，孖住行超市買餸玩煑飯仔。對戀情一向拉鏈嘴的 Bosco黃宗澤，今次冇得抵賴，直認同 Jun「了解中」。
新任澤嫂是日本紅模，在日本茨城出世，有五呎八吋高，腰幼得二十二吋，但上圍就平平無奇，僅得 29AA。有齊高瘦平三項特質，正宗 model身形，啱晒 Bosco胃口，去年與 Jun合作拍廣告，一見嗒糖。
一見嗒糖
機不可失！據了解，拍廣告當日， Bosco以一盡地主之誼為由，提出收工後他請客，請 Jun同工作人員一齊飲酒慶功，據有份在場的工作人員指，當晚大班人一共開了十支紅酒，氣氛升溫， Bosco趁機向對方抄牌交換電話，結果一擊即中。行埋七個月，雖然分隔兩地又有語言障礙，但關係仍火速發展。
「 Bosco一向喜歡啲高高瘦瘦 model身形嘅女仔，之前佢同楊崢都係一見就着嗰隻。 Jun無論年紀、外形都係佢杯茶，至於語言方面， Jun識講英文，但 Bosco英文唔算流利，但勉強都溝通到。」 Bosco身邊人說。
高級品牌御用
Jun雖然樣貌唔算標青，但夠型夠格，同時被日本和巴黎的 model公司睇中簽約。去年尾，她接拍了一個蘆薈飲品廣告，廣告中穿上白色長裙騎大象，被日本網民激讚。
除了日本本土市場， Jun也是多個歐洲高級品牌的御用 model，比起楊崢姐姐， Bosco今次可以大大聲認：我女友係 model！
撰文、攝影、攝錄：娛樂組
|
鍾意就快D Share啦！
|
|
|
