娛樂偵訊
玩大咗無綫唔吼 龐卓欣降呢做 blogger
十優港姐麥明詩與無綫拉鋸四個月，最終於今年初屈服被綁五年。眼見死敵已投降歸順，一直抗拒簽長約的龐卓欣（ Ada），早前安排富貴父母同樂易玲見面，點知大小姐耍性格辣㷫大媽，即時被掟入雪櫃；為保人氣，龐卓欣只好降呢做 blogger，等解凍。
屈服簽五年
有個東驥基金管理董事總經理龐寶林做老豆，是家中獨女的龐卓欣自小要風得風，要雨得雨。
「 Ada入行都係賺錢買花戴，選完港姐佢顧住拍拖周圍去，一直都拖住唔肯同無綫簽約。麥明詩本來都一樣，只係想簽兩年玩吓，不過無綫企硬，最後都要屈服簽五年，佢簽咗約公司就即刻安排做新節目， Ada見到咁，開始擔心再扭計會錯失機會，態度已經冇開始時咁硬。」知情者說。
大小姐辣㷫大媽
季軍郭嘉文第一時間賣身，跟無綫簽下八年長約，是同屆港姐最先被安排拍劇，在《廉政行動 2016》其中一個單元與陳展鵬合作，仲要做女主角。
「其實無綫一直都有搵 Ada傾約，之前佢亦帶埋父母一齊見樂易玲傾合約嘅嘢，不過 Ada的大小姐性格完全冇俾面，樂小姐好㷫，加上 Ada爸爸唔想佢簽咁長年期，所以最後乜都傾唔成，無綫亦放軟手腳，索性冰鮮 Ada。」
教化妝扮靚
眼見郭嘉文、麥明詩已經埋晒位，無綫又對自己不聞不問，冇嘢做的龐卓欣為 keep住人氣，降呢都照做，在 YouTube教人化妝扮靚做 blogger。
「 Ada係任性大小姐性格，不過唔係蠢，佢知道再咁落去，有個港姐亞軍名銜都冇用，所以佢做住 blogger喺 YouTube教化妝扮靚， keep住有得曝光，等無綫軟化再傾簽約，好過乜都唔做嘥時間。」知情者說。
上週六（三月十二日），龐卓欣約埋一班落選港姐到灣仔食日本菜，之後再直落銅鑼灣皇室堡食雪糕；去唔到食飯的麥明詩亦有蒲頭 join埋食甜點。唔想再同無綫硬碰的龐卓欣，大可向已經投降的麥明詩，請教如何氹番無綫。
撰文、攝影、攝錄：娛樂組
|
鍾意就快D Share啦！
|
|
|
