由宋仲基及宋慧喬主演嘅韓劇《太陽的後裔》，喺韓國打破《來自星星的你》嘅收視紀錄，兩位主角仲會喺 4月 5日嚟香港宣傳，熱潮銳不可擋！
電視精
《太陽的後裔》熱爆 解構神劇魅力
不經不覺《來自星星的你》已經係前年嘅韓劇，不過呢兩年來，即使有高收視嘅劇集，但係都無一套劇可以引起當年嘅社會效應，今年終於等到《太陽的後裔》（下稱《太陽》）！
由宋慧喬、宋仲基主演嘅《太陽的後裔》，播出之前已經備受關注，果然不負眾望，播出三個星期收視高企，第六集收 28.5%，已經突破《來自星星的你》結局 28.1%嘅收視，氣勢銳不可擋！究竟《太陽》有乜咁吸引？未睇同睇咗嘅都一齊重溫！
劇情進展快
好多人怕睇韓劇，就係嫌佢婆媽冗長，不過《太陽》就無呢個毛病。第一集已經講宋仲基飾演嘅劉時鎮同宋慧喬飾演嘅姜暮煙醫生一見鍾情，第二集已經分手，第三集重遇，第四集已經 kiss！簡直係顛覆韓劇嘅固有模式，令觀眾更有新鮮感！除咗「雙宋」嘅主角感情線之外，男女配角晉久及金智媛嘅感情一樣吸睛，令劇迷追到欲罷不能！
異國情懷誘人
《太陽》以軍隊為故事背景，題材較新鮮。一早已經講明係大製作，完成所有拍攝先播出嘅方式，喺韓劇中好少見，令配樂及視覺效果等等後期工作都特別出色。故事中劉時鎮及姜暮煙於戰地相遇，特別遠赴希臘拍外景，靚人靚景加唯美拍攝，有傳製作費高達八千萬港幣，觀眾都大讚賞心悅目，異國浪漫零舍吸引！
緊張輕鬆兼備
《太陽》打正旗號係浪漫愛情劇，其實打仗都只係為感情線做點綴，不過一啲都唔馬虎。執行任務嘅情節非常緊湊，臨場感十足，可以媲美電影。同時轉睇番感情線時，又非常 sweet。播出六集，已經有好多男女主角互相角力嘅金句，睇到劇迷心癢癢！
三大心動場面
《太陽》最吸引嘅，當然係男女主角宋慧喬及宋仲基！兩位於韓國以至海外人氣爆燈，猶如當年嘅金秀賢同全智賢！劇迷大讚選角出色，非常登對，令談情場面都特別吸引。以下幾個場面令劇迷留下深刻印象，值得一睇再睇！
撰文：關錦雯
|
鍾意就快D Share啦！
|
|
|
