被封為「Double S」嘅陳欣妍（Shirley）同沈殷怡（Shirley），早前因為拍ViuTV節目《美女郊遊遊》日日去行山，所以體能反應都有返咁上下，點知最近因為疫情而搞到日日work from home，相信佢哋身手同體能點都會有影響！為咗測試佢哋體能有冇退步，《今日ENT》就邀請咗佢哋嚟《蘋果》嘅錄影廠，以對戰形式挑戰兩個而家最hit嘅健身Game，同網民邊打機邊keep fit。
陳欣妍同沈殷怡表面上好似有備而戰，但係聽到個game又要深蹲同提腿，沈殷怡即刻叫對腳要爭氣啲！最初佢哋雞手鴨腳，仲唔係好明Game入面啲指示，不過玩咗一陣就已經開始上手。可能嫌個game唔夠難，所以陳欣怡玩玩下就出IQ題考沈殷怡，邊扭腰邊答問題嘅沈殷怡即話：「你搞到我亂晒，而家到底要跑定深蹲！」完成健身Game後，佢哋再挑戰跳舞Game，不過無跳開舞嘅Double S充份表現出手腳唔協調同零拍子感嘅一面。雖然沈殷怡有「廢Shir」之稱，但平日甚少運動，玩起健身同跳舞Game時，竟然比陳欣妍得心應手，最後仲贏埋！而輸咗嘅陳欣妍，就要接受擺出20秒「性感到尷尬」嘅甫士嘅挑戰，隔籬嘅沈殷怡笑住話：「我扮Props陪你啦，依家我扮燈柱畀你擺pose！」
除了打機對戰外，《今日ENT》還準備了抽問題環節，其中陳欣妍抽中要爆對方一個小秘密，佢話：「呢個好簡單，沈殷怡，請你示範一下你嘅笑聲！」沈殷怡即失笑，發出謎之古怪笑聲，但陳欣妍竟然嫌對方笑得唔夠厲害，出力仲引佢笑，沈殷怡即以高八度的笑聲說：「你好煩呀！各位觀眾，呢個係我嘅新朵，叫做『笑聲機關槍』！」
對於被受連登仔熱捧，沈殷怡都話好感謝大家嘅支持，仲點名多謝一位叫「沈殷怡男朋友」嘅連登巴打：「我有個朋友CAP咗圖畀我，係一個叫『沈殷怡男朋友』嘅人，好多謝你，令到我嘅單身生活冇咁孤獨！」有網民指話唔信沈殷怡單身，佢即唏噓表示：「空虛寂寞呢啲嘢，我就成日拎出嚟講！你唔信我嘅話，不如喺呢度報名，可唔可以招募一吓！」而早前曾於IG直播中哭訴被人騷擾嘅陳欣妍，坦言事情解決唔到，所以佢要好提升個人智慧去面對：「呢啲事係解決唔到，所以係解決咗我自己個人，係提高咗山自己嘅智慧，擴闊咗心胸。」
問到兩位拍完《美女郊遊遊》後，有乜要抱怨對方？陳欣妍率先表示自己心痛沈殷怡嘅健康問題，又指對方拍攝期間經常流鼻血，所以希望佢可以注意安全同健康。拍檔如此窩心，但沈殷怡竟然爆陳欣妍經常於野外去廁所：「我為咗呢個節目，成日都忍尿忍到膀胱炎，但係我隔籬呢位小姐，成日都喺荒山野嶺要搵廁所，但係問題係我已經行得慢，成team已經dalay咗，點知佢又要去廁所，搞到又要再dalay。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|