掃呢頁CODE去手機

2018年4月7日 星期六

港姐愛小生!郭藹明陳茵媺嫁個好老公 __,茵媺,郭藹明,港姐,陳茵媺,

甜到漏呀!香港小姐有樣貌又有智慧,係唔少人心目中嘅女神。身為女神,當然身邊嘅另一半都唔差,有樣有才華,可以話才子配佳人,港姐愛小生!當中好多圈中港姐嫁 ...


甜到漏呀!


香港小姐有樣貌又有智慧,係唔少人心目中嘅女神。身為女神,當然身邊嘅另一半都唔差,有樣有才華,可以話才子配佳人,港姐愛小生!當中好多圈中港姐嫁畀嘅小生,都各有魅力同風格,而佢哋亦都係圈中嘅「愛妻號」之一,每個都對太太好到,簡直係「對你愛愛愛不完」呀!

袁詠儀 張智霖

「但旁人始終不會明,盟約是着重在心境,早已認定是對方,亦不必一張紙定情。」

呢首歌《未婚妻》可能唔係好多人熟悉,但對於1990年港姐冠軍袁詠儀(靚靚)嚟講,就好有意義,皆因係老公張智霖喺2003年請求填詞人黃偉文度身打造,畀個名份靚靚,以「不公告天下」嘅方式,偷偷放閃!佢兩個喺1993年合作拍攝電影《邊城浪子》而認識,兩個都曾講過當時對對方已有好感,之後開始拍拖,至2001年兩個低調喺美國結婚,2006年生咗仔仔張慕童,一家三口幸福美滿。兩個結婚至今17年仍然恩愛,2015年兩個仲齊齊參與內地真人騷《一路上有你》,當中張智霖亦喺第一季最尾一集向太太補辦求婚,感動唔少觀眾!

郭藹明 劉青雲

講到圈中港姐模範夫婦,真係數都數唔晒,但梗係唔可以唔提1991年港姐冠軍郭藹明同老公劉青雲,佢哋恩愛程度爆晒燈,真係好令人羨慕!佢兩個就喺1992年因合作拍攝無綫劇《大時代》而相識,隨後二人拍拖交往,1998年拉埋天窗。

婚後藹明就淡出幕前,專心做青雲背後嘅女人,佢哋結婚20年,依然恩愛如昔,唔單止不時被拍到拖實甜蜜行街,而2015年嘅第34屆香港電影金像獎,青雲奪得「最佳男主角」獎項時,喺台上以「太空船論」向太太發表愛的宣言,佢就話:「每次當我揸太空船唔知去到邊,你總有辦法令我安全返到地球。」嘩!呢句宣言點會唔令到藹明冧爆,簡直係2015年度金句,仲令唔少女士好葡萄添呀!

盧淑儀 李克勤

香港小姐向來美貌與智慧並重,好似1992年港姐冠軍盧淑儀(Emily)就絕對係其中一位喇!有咁好條件,另一半當然都唔會差,佢就係有把靚聲嘅李克勤喇!

Emily參選港姐時,就同作為表演嘉賓嘅李克勤認識,而克勤亦被Emily笑容談吐吸引,開始展開猛烈追求。隨後二人開始拍拖,直至2006年先喺英國低調結婚,而Emily亦淡出幕前,2007年生咗大仔李立仁,2010年生咗二仔李力司。結婚12年,克勤對Emily嘅愛有增無減,係圈中嘅「愛妻號」之一,唔單止成日有空就抽空陪伴家人,又一齊打羽毛球,早前Emily 43歲生日時,克勤仲送上一個寫有「你是世上最好媽媽」字牌嘅生日蛋糕,一家四口Sweet 爆!

蔡少芬 張晉

所謂「對的時間,遇上對的人」,1991年港姐季軍蔡少芬(Ada)喺2003年同張晉拍內地劇《靈鏡傳奇》而認識,隨後二人拍拖4年,雖然最初二人唔被睇好,但最終喺2008年拉埋天窗。Ada喺2011年為老公誕下大女張楚兒,2013年再誕下細女張信兒,一家四口相當幸福。

而喺2014年第33屆金像獎,張晉奪得「最佳男配角」獎項,佢喺台上對太太發表感謝宣言,表示呢一世嘅幸福都要靠佢,感謝佢陪自己走過艱難嘅路同低潮,佢就話:「我曾經跟她說『只有你欣賞我沒用』,但謝謝大家欣賞我。」

早前佢哋結婚十周年,Ada同老公仲着番當年結婚禮服同兩位囡囡影輯溫馨家庭照,當中張晉話:「繼續風雨同路,看看下一個十年還能不能穿!」執子之手,與子皆老。

陳茵媺 陳豪

每個女仔都希望另一半又高大型仔,最好又識啲浪漫,不過現實中又有幾多個咁完美嘅男士?

但係凡事都有例外,好似2006年港姐冠軍陳茵媺(Aimee),佢就嫁咗個完美老公陳豪(阿Mo)喇!佢哋喺2010年合作拍攝劇集《心戰》撻着,二人更喺2013年巴黎舉行浪漫婚禮。結婚後二人積極造人,Aimee喺2013年底為老公生咗大仔陳梓燁,2015年就生咗二仔陳浩鋒,2016年再生咗細女陳凱婷,三年抱三!

眾所皆知,Aimee同阿Mo人前人後都係咁恩愛,阿Mo曾向太太發表愛的宣言:「She is my queen!」呢一句絕對令到Aimee甜到入心,而阿Mo唔係得把口,將太太當係女王一樣,喺太太照顧小朋友期間,擔當養家責任。即使佢哋有小朋友,都仍然愛得甜蜜,阿Mo講過:「夫妻嘅感情係需要大家攞時間出嚟,攞出大家嘅精神,去做一啲好似拍拖嘅事。」所以佢哋不時行街拍拖睇戲食飯,仲會每年過二人世界嘅旅行,阿Mo咁識保鮮愛情,真係令人羨慕呀!

----------------------------

東網巨星開咗ig喇,大家快啲follow

https://goo.gl/KGuo2N


來源 source: http://hk.on.cc
鍾意就快D Share啦!